Օգոստոսի 29-ին Երևանում տեղի ունեցավ Սամվել Կարապետյանի նախաձեռնությամբ հիմնադրված «Մեր ձևով» ժողովրդական շարժման շնորհանդեսը և համակարգող խորհրդի մամուլի ասուլիսը։
Միջոցառման սկզբում ընթերցվեց շարժման հիմնադիր Սամվել Կարապետյանի ուղերձը, որում, մասնավորապես, ասված է․
«Մեր ձևով» շարժումը դառնալու է այն հենքը, որի վրա կձևավորվի նոր քաղաքական ուժը. ուժ, որի կարիքը բոլորն են զգում այսօր։
Կարդացեք նաև
Մեր ծրագրերը հաստատուն են։ Մենք շարունակելու ենք Մե՛ր ձևով»։
Շարժման համակարգող խորհրդի ղեկավար Նարեկ Կարապետյանը հանդես եկավ բացման խոսքով՝ անդրադառնալով Հայաստանում վերջին տարիներին տիրող իրավիճակին և ներկայացնելով շարժման հիմնական 5 ուղղությունները՝ համապատասխան աշխատանքային խմբերով՝
1) Տնտեսական հարցերով աշխատանքային խումբ․ նոր տնտեսություն՝ աշխատանք բոլորի համար, բարեկեցություն բոլորի համար,
Աշխատանքային խումբը հավաքելու է համաշխարհային և հայկական տնտեսագետների թիմ, որը մշակելու է Հայաստանի տնտեսական զարգացման նոր մոդելը՝ հետևյալ հիմնական ուղղություններով՝ արդյունաբերություն, գյուղատնտեսություն, բարձր տեխնոլոգիաներ,
2) Երիտասարդ ընտանիքների աջակցության հարցերով աշխատանքային խումբ․ մեծ հայկական ընտանիք,
Աշխատանքային խումբը մշակելու է ժողովրդագրական նոր քաղաքականություն՝ ծնելիության աճի խթանում, մայրության դերի բարձրացում, ընտանիքներին աջակցության ծրագրեր, առողջապահության նոր համակարգի ստեղծում,
3) Արտաքին քաղաքականության հարցերով աշխատանքային խումբ,
Խումբը ուսումնասիրելու է իրական խաղաղության հաստատման հնարավորությունը, կմշակի ստեղծված աշխարհաքաղաքական իրավիճակին համապատասխան արտաքին քաղաքականություն,
4) Երիտասարդների աջակցության աշխատանքային խումբ․ տաղանդավոր երիտասարդների աջակցության ծրագիր,
Աշխատանքային խումբը մշակելու է տարբեր ոլորտների տաղանդավոր երեխաների և երիտասարդների աջակցության մի շարք ծրագրեր, մանկապատանեկան սպորտի ոլորտում նոր քաղաքականության ծրագրի մշակում՝ մանկությունից մինչև մեծ բեմ,
5) Հայ Առաքելական Սուրբ Եկեղեցու և ազգային արժեքների պահպանության աշխատանքային խումբ։
Աշխատանքային խմբի նպատակն է՝ մշակել քաղաքականություն՝ 21-րդ դարի հասարակությունում Հայ Առաքելական Սուրբ եկեղեցու դերի բարձրացման համար, այդ թվում՝ տարբեր բացասական երևույթների (խաղամոլություն, թմրամոլություն և այլն) դեմ պայքարի շրջանակներում, համահայաստանյան մշակութային ժառանգության պահպանության քաղաքականության մշակում, Հայաստանը՝ աշխարհում քրիստոնեության կենտրոն դարձնելու հայեցակարգի մշակում։
Այնուհետև Նարեկ Կարապետյանը խոսքը փոխանցեց ներկայացված աշխատանքային խմբերի անդամներին, որոնք ներկայացրեցին շարժման հետագա անելիքները՝ ըստ ուղղությունների։
Շարժման 5 աշխատանքային խմբերի ներկայացումից հետո Նարեկ Կարապետյանը պատասխանեց ԶԼՄ ներկայացուցիչների հարցերին։
Նարեկ Կարապետյանի խոսքը «Մեր ձևով» ժողովրդական շարժման շնորհանդեսին․
«Հարգելի հայրենակիցներ,
Հայաստանի հասարակական և քաղաքական կյանքում մենք հասել ենք մի կետի, երբ մեր ժողովրդի սպասելիքները չեն բավարարվում: Առկա հասարակական և քաղաքական խմբերը, կենտրոնանալով իրար հանդեպ ատելություն քարոզելու վրա, մեր ժողովրդի մեջ հակասություններ են սերմանում և ինչքան ավելի շատ է հակասությունն ու ատելությունը, այնքան ավելի անհաջող են գնում մեր գործերը:
Այստեղ կարևոր դեր ունի իշխանության գործելաոճը, մարդիկ ցավոք չտրանսֆորմացվեցին ընդդիմադիր դեղին մամուլի խմբագրից պետական միավորող գործչի, ինչը մեր հասարակությունը կողջուներ: Ընդդիմության ատելությունն էլ, որը առաջացել է անարդարություններից, խանգարում է իրավիճակին նայել սառը և ավելի ոչ էմոցիոնալ:
Տարիներ առաջ իշխանության եկած խումբը մեզ կոչում էր հպարտ քաղաքացիներ: Մենք էլ ուրախանում էինք: Կարո՞ղ ենք ասել, որ հպարտ ենք:
Այսօր նրանք մեզ մի ուրիշ բանի մեջ են համոզում: Նրանք ասում են, որ մեր ազգը պետք է զիջի ու համակերպվի, որ մեր ազգը Ձև չունի:
Որ մեր երկրի զարգացումը ոչ թե ճիշտ և հետևողական աշխատանքի մեջ է, այլ հարևաններին հանձնվելու, ազգային խորհրդանիշները կորցնելու, չտարբերվելու մեջ է:
Հարգելի հայրենակիցներ,
Հայ ազգը Ձև ունի՛: Մնում է բոլորին ցույց տալ Մեր Ձևը:
Այսօր մենք՝ ազգային բարերար Սամվել Կարապետյանի համախոհներս և գործընկերներս, հայտարարում ենք «Մեր ձևով» կամավորական շարժման հիմնադրման մասին:
Ինչ է նշանակում կամավորական շարժում և ինչու ենք մենք հայտարարում դրա, այլ ոչ թե կուսակցության մեկնարկի մասին:
Կամավորական շարժումը այն հարմար ձևաչափն է, որը թույլ կտա առանց բաժանելու մեր հասարակությունը, համախմբել մարդկանց լավ, մեծ և բարի գործեր անելու համար:
Շարժումը ապաքաղաքական կամավոր միավորում է՝ մարդկանց, ովքեր պատրաստ են անձնուրաց ծառայել հանրօգուտ նպատակի: Շարժման մասնակիցները կարող են լինել տարբեր մասնագիտությունների և հայացքների տեր մարդիկ, ովքեր կարող են աշխատանքից ազատ ժամանակ մասնակցել շարժման աշխատանքներին:
Նշանակում է արդյոք, որ մենք կուսակցություն, կոնկրետ ինչպես Սամվել Կարապետյանն էր ասում՝ սկզբունքորեն նոր քաղաքական ուժ, այլևս չենք ստեղծելու։ Ո՛չ, չի նշանակում։ Սա մեր կատարելիք աշխատանքի միայն առաջին փուլն է։ Հայաստանում առաջիկայում ընտրական գործընթացներ են սպասվում, և դրանց մասնակցելու օրենքով նախատեսված ամենահարմար ձևը կուսակցական մասնակցությունն է։ Եվ մեր գործունեության երկրորդ փուլում մենք պատրաստվում ենք մեր մշակած մասնագիտական ծրագրերը, նախագծերը շարժման հիման վրա ստեղծվելիք կուսակցության միջոցով վերածել պետական ծրագրերի։ Վստահ ենք, որ կարողանալու ենք դա անել 2026 թվականին կայանալիք ընտրական գործընթացների արդյունքում։
Եվ այսպես, ինչով է զբաղվելու շարժումը։ Շարժումը իրականացնելու է գործողություններ՝ 5 ուղղություններով, ստեղծվելու է 5 աշխատանքային խումբ։ Ես կթվարկեմ, թե խմբերի հիմնական ուղղությունները որոնք են, և բոլորս կհասկանանք, թե ինչ կարևոր նշանակություն են դրանք ունենալու մեզ համար։
Անպայման ուզում եմ հատուկ անդրադառնալ նաև մեր շարժման անվանմանը։ Ի՛նչ է նշանակում «Մեր ձևով»։ Այս բառակապակցությունը Սամվել Կարապետյանի հայտնի հարցազրույցից հետո թևավոր խոսք է դարձել հայության մեջ ամբողջ աշխարհում։ Կարծում ենք, որ արդեն բոլորը հասկացել են, որ «Մեր ձևով» նշանակում է հայավարի, այսինքն՝ պատվով, աշխատասիրությամբ և խելքով։ Մեր ձևով նշանակում է արժանապատվությամբ։ Մեր ձևով՝ այսինքն հանուն մեր երեխաների իրական ու բարեկեցիկ ապագայի։ Ու մենք ինչ անենք, անելու՛ ենք՝ մեր ձևով։
Սիրելի հայրենակիցներ,
Վստահ լինելով, որ գալիք քաղաքական և ընտրական գործընթացներում հայ ժողովուրդը մերժելու և իշխանությունից հեռացնելու է գործող փոքրիկ խմբակին, այս շարժման օգնությամբ մենք ջանում ենք միավորել ազգային ներուժը և ձևավորել այնպիսի Հայաստանի տեսլական, որը հնարավոր կլինի ընդամենը 5-6 տարում իրականություն դարձնել։ Դա լինելու է մեր իրական երազած Հայաստանը, որը կրկին աշխարհի բոլոր հայերի հարազատ տունը կլինի՝ բարեկեցիկ, երջանիկ և պաշտպանված։
Անելու ենք՝ մեր ձևով»։
Հակիրճ տեղեկանք «Մեր ձևով» ժողովրդական շարժման մասին
«Մեր ձևով» շարժումը մարդկանց՝ ոչ ֆորմալ, իրավաբանական ձև չունեցող, ապաքաղաքական կամավոր միավորում է, ովքեր պատրաստ են անձնուրաց ծառայել հանրօգուտ նպատակի։
Շարժումը հիմնադրվել է ապօրինի կալանքի տակ գտնվող Սամվել Կարապետյանի նախաձեռնությամբ։
Շարժման մասնակիցները կարող են լինել տարբեր մասնագիտությունների, տարբեր քաղաքացիություն ունեցող մարդիկ, որոնք կարող են որոշակի պաշտոններ զբաղեցնել պետական և մասնավոր կառույցներում, ինչը որևէ կերպ չի հակասում նրանց գործունեությանը շարժման մեջ։ Ըստ այդմ՝ համարվում է, որ շարժման մասնակիցները (փաստորեն՝ կամավորները) շարժման գործերով զբաղվում են անհատույց եւ իրենց ազատ ժամանակի հաշվին։ Շարժման անդամները ձեռք չեն բերում պարտադիր անդամակցություն եւ ազատ են ընտրելու շարժման գործունեության այն տեսակներն ու ժամանակահատվածները, որոնց ցանկանում են մասնակցել։
