ՀՅԴ Լիբանանի Հայ Դատի մարմինը Լիբանանի մէջ ԵԱՀԿ-ի անդամ երկիրներու դեսպաններուն նամակներ յղելով անդրադարձաւ 8 Օգոստոսին Ուաշինկթընի մէջ Թրամփ-Փաշինեան-Ալիեւ եռակողմ հանդիպումի ընթացքին ստորագրուած միացեալ հռչակագիրին մէջ նշուած ԵԱՀԿ-ի Մինսքի խմբակը լուծարելու կոչին` նշելով, որ անիկա Արցախի բնակչութեան դէմ գործուած ցեղային զտումէն ի վեր «խաղաղութեան» համաձայնագիրի կնքման համար ազրպէյճանի նախապայմաններէն մէկն է:
Հայ Դատի մարմինը դեսպաններուն ուշադրութեան յանձնեց, որ մինչ Հայաստան-Ազրպէյճան խաղաղութեան համաձայնութեան նախագիծը կը ներկայացուի իբրեւ «արդար, համապարփակ եւ տեւական խաղաղութիւն» հաստատելու համաձայնութիւն, այդ «խաղաղութիւն»-ը ո՛չ արդար է, ո՛չ ալ համապարփակ, որովհետեւ զանց կ՛առնէ իսկական խաղաղութեան համար բանալի խնդիրներ` արցախահայութեան տունդարձի միջազգայնօրէն ամրագրուած իրաւունքը, հայ ռազմաքաղաքական գերիներու առանց որեւէ նախապայմանի ազատ արձակումը եւ Հայաստանի Հանրապետութեան բռնագրաւուած հողերէն ազրպէյճանական զօրքերու հեռացումը:
Հայ Դատի մարմինը շեշտեց, թէ ԵԱՀԿ-ի Մինսքի խմբակի ստեղծման հիմնական պատճառը` արցախահայութեան իրաւունքներու եւ անվտանգութեան հարցը տակաւին կը յամենայ, անիկա չէ լուծուած, հակառակ պաքուի եւ անգարայի պնդումներուն: Ուստի ԵԱՀԿ-ն եւ միջազգային ընտանիքը պէտք է շարունակեն ներգրաւուած մնալ:
Հայ Դատի մարմինը ընդգծեց, որ ԵԱՀԿ-ի Մինսքի խմբակի ձեւաչափը կրնայ աշխարհաքաղաքական պայմաններու բերմամբ թուլացած ըլլալ, սակայն անիկա կրնայ յստակ եւ կեսնական դերակատարութիւն ունենալ հայ գերիներու ազատ արձակման հարցին մէջ, ինչ որ կը վերաշխուժացնէ այդ ձեւաչափը:
Կարդացեք նաև
ՀՅԴ Լիբանանի Հայ Դատի մարմինը նոյն հարցով Լիբանանի մէջ Միացեալ Նահանգներու դեսպան Լայզա Ճոնսընին ալ յղեց այլ նամակ մը, որուն մէջ վերոնշեալներուն կողքին նշեց, թէ Ուաշինկթընի մէջ ստորագրուած եռակողմ հռչակագիրին մէջ կը նշուի «հետագայ գործողութիւնները շարունակելու անհրաժեշտութիւնը», եւ ատկէ մեկնելով Միացեալ Նահանգներու նախագահ Տանըլտ Թրամփին ու անոր վարչակազմին կոչ ուղղեց` աշխուժ կերպով հետապնդելու արցախահայութեան տունդարձի միջազգայնօրէն ամրագրուած իրաւունքի իրականացման, հայ ռազմաքաղաքական գերիներու առանց որեւէ նախապայմանի ազատ արձակման ու Հայաստանի Հանրապետութեան բռնագրաւուած հողերէն ազրպէյճանական զօրքերու հեռացումը ապահովելու հարցերը, «որովհետեւ անոնք մարդկային իրաւանց կարեւոր հարցեր են եւ «արդար ու համապարփակ» համաձայնութեան մը համար կենսական»:
ՀՅԴ Լիբանանի Հայ Դատի մարմին
