Արցախի մշակույթի նախարարության ՖԲ էջից տեղեկանում ենք.
Վահան Շահրամանյանի նախաձեռնությամբ և մեծ էնտուզիազմի շնորհիվ Երևանում՝ Հալաբյան փողոց 34/ա հասցեում, «Խառնել-Միացնել» անվամբ վերստին իր դռները բացեց Ստեփանակերտում գործող «Վերնատուն» ակումբ-ցուցասրահը։
Այստեղ ներկայացված են արցախցի լավագույն նկարիչների՝ Էդմոն Պետրոսյան (Դիքեն), Վահան Շահրամանյան, Առնոլդ Մելիքսեթյան, ստեղծագործությունները:
Կտավների և արվեստի գործերի զգալի մասը հաջողվել է փրկել Ստեփանակերտից՝ 2023 թվականի բռնի տեղահանության ժամանակ, և այժմ դրանք իրենց երկրորդ կյանքն են գտել Երևանում։
Կարդացեք նաև
Ակումբը միավորում է երկխոսության և մտքերի փոխանակման միջավայրը՝ հիշեցնելով «Վերնատան» ավանդույթը և միաժամանակ հանդիսանում է գեղարվեստական ցուցասրահ։ Կտավների կողքին ցուցադրված են նաև մշակութային-պատմական ու այլ արժեքավոր արտեֆակտներ, որոնք կրում են Արցախի և Հայաստանի պատմական հիշողությունն ու հոգևոր էներգիան։
Այս նախաձեռնությունը ոչ միայն պահպանում է Արցախի մշակութային ժառանգությունը, այլև նոր հնարավորություններ է ստեղծում մեր արվեստը Երևանի մշակութային կյանքում ճանաչելի ու հասանելի դարձնելու համար։
