Ինչպես հաղորդում են ռուսական լրատվամիջոցները՝ Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Մոսկվան ակնկալում է Հայաստանի եւ Ադրբեջանի քայլեր՝ «3+3» ձևաչափի հերթական հանդիպման անցկացման ժամկետներն ու վայրը համաձայնեցնելու ուղղությամբ։
«Մենք սպասում ենք, որ ադրբեջանցի եւ հայ գործընկերները կձեռնարկեն գործուն քայլեր՝ արագացված կերպով համաձայնեցնելու հաջորդ հանդիպման անցկացման վայրը եւ ժամկետները։ Միաժամանակ մենք մեր կողմից պատրաստ ենք գործընկերներին տրամադրել անհրաժեշտ աջակցություն բոլոր հարցերի շրջանակում», — նշել է Զախարովան Մոսկվայում կայացած ճեպազրույցում։
«Կարեւոր է հաղթահարել մնացած տարաձայնությունները, ստորագրել խաղաղության պայմանագիր, արդար հիմքերի վրա ավարտին հասցնել սահմանի սահմանազատումն ու սահմանագծումը, ինչպես նաեւ բացել տրանսպորտային հաղորդակցությունները։ Դա պետք է արվի այնպես, որ բխի երկու երկրների, ինչպես նաեւ տարածաշրջանի խոշոր քաղաքական ու տնտեսական գործընկերների՝ Ռուսաստանի, Իրանի եւ Թուրքիայի շահերից», — նշել է Զախարովան։
Նրա խոսքով, «3+3» տարածաշրջանային համագործակցության հարթակը լավ հնարավորություն է հայ-ադրբեջանական կարգավորման եւ Հարավային Կովկասի այլ խնդիրների քննարկման համար։
Կարդացեք նաև
«Մենք սպասում ենք, որ ադրբեջանցի եւ հայ գործընկերները գործուն քայլեր կձեռնարկեն՝ արագացված կերպով համաձայնեցնելու հաջորդ հանդիպման վայրը եւ ժամկետները։ Մեր կողմից պատրաստ ենք տրամադրել անհրաժեշտ աջակցություն բոլոր հարցերի շրջանակում», — ասել է ԱԳՆ խոսնակը։
«3+3» հարթակը, որի մասնակիցներն են Ռուսաստանը, Թուրքիան, Իրանը, Ադրբեջանը, Հայաստանը եւ Վրաստանը, ստեղծվել է 2020 թվականին Ադրբեջանի եւ Թուրքիայի նախագահներ Իլհամ Ալիեւի ու Ռեջեփ Թայիփ Էրդողանի նախաձեռնությամբ՝ Հարավային Կովկասում եւ Մերձավոր Արեւելքում համագործակցության հարցերը քննարկելու նպատակով։ Վրաստանը բազմիցս հրավիրվել է միանալ, սակայն առայժմ չի մասնակցում դրա աշխատանքներին։
Հարթակի առաջին հանդիպումը՝ փոխարտգործնախարարների մակարդակով, տեղի ունեցավ 2021 թվականի դեկտեմբերին Մոսկվայում։ Հետագայում հանդիպումները շարունակվել են նախարարական մակարդակով․ 2023 թվականի հոկտեմբերին հանդիպում կայացավ Թեհրանում, իսկ վերջինը՝ 2024 թվականի հոկտեմբերի 18-ին Ստամբուլում։
Զախարովան հիշեցրել է, որ Ռուսաստանի համար առաջնահերթություն է մնում խաղաղության եւ կայունության ամրապնդումը Հարավային Կովկասում։ Նրա խոսքով, Բաքվի եւ Երեւանի երկար սպասված հաշտությունը պետք է լինի կայուն, քանի որ դա ամբողջ տարածաշրջանի բարգավաճման նախապայմանն է։
Նա ընդգծել է, որ հայ-ադրբեջանական կարգավորման ներկայիս փուլը մեկնարկել է Ռուսաստանի եւ անձամբ նախագահ Վլադիմիր Պուտինի ակտիվ միջնորդությամբ։ «Մեր անմիջական մասնակցությամբ 2020–2022 թվականներին ձեռք բերված բարձր մակարդակի պայմանավորվածությունները բառացիորեն կանգնեցրին արյունահեղությունը եւ որոշեցին խաղաղ գործընթացի հիմնական ուղղությունները», — ասել է Զախարովան։
Նրա խոսքով, այն ժամանակ համաձայնեցված համալիր միջոցառումները՝ խաղաղության պայմանագրի մշակումը, տրանսպորտային եւ տնտեսական կապերի ապաշրջափակումը, սահմանի սահմանազատումն ու սահմանագծումը, ինչպես նաեւ քաղաքացիական հասարակությունների երկխոսության զարգացումը, այժմ էլ չեն կորցրել իրենց նշանակությունը եւ օգտագործվում են կողմերի կողմից։
«Այս համատեքստում մենք ողջունում ենք արձանագրված առաջընթացը», — եզրափակել է Զախարովան։
