«Խնդիրը ոտքի վրա, շըփ-թըփ անելու չի, ռազմավարական խնդիր է, նախօրոք կազմակերպեիք, որ կարողանայինք կարծիք հայտնել»,-խորհրդարանում տարածքային կառավարման եւ ենթակառուցվածքների նախարար Դավիթ Խուդաթյանին դիմեց «Հայաստան» խմբակցության պատգամավոր Արման Ղազարյանը։
ԱԺ արտահերթ նիստում քննարկվում է «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան եւ համալիր ծրագրերը հաստատելու մասին» օրենքում լրացումներ կատարելու մասին» օրենքի նախագիծը: Նախագծով առաջարկվում է Սեւանից գյուղատնտեսական նպատակների համար նախատեսված ջրառն ավելացնել․ 200 միլիոն խորանարդ մետր ջրառ սահմանել՝ 170-ի փոխարեն։
Պատգամավորների հարցերը վերաբերվում էին նախագծի հրատապությանը․ կառավարությունն առաջարկում է 24-ժամյա ռեժիմով քննարկել նախագիծը։ Հետաքրքրվում էին՝ կառավարությունում այսօ՞ր իմացան ջրառը մեծացնելու հրատապության մասին։
«Ինչի՞ եք Սեւանին վերաբերվում որպես ջրի տարա»,- Դավիթ Խուդաթյանին հարցրեց «Պատիվ ունեմ» խմբակցության պատգամավոր Թագուհի Թովմասյանը՝ հիշեցնելով Նիկոլ Փաշինյանի 2018 թվականի օգոստոսի 6-ի հայտարարությունը, որ շղթան պետք է ճեղքել եւ դադարել Սեւանին վերաբերվել իբրեւ ջրի տարա։ Դավիթ Խուդաթյանը հայտարարեց, որ անկախ Հայաստանում Սեւանից միշտ է ջրառ եղել եւ իրենց իշխանության տարիներին ջրառը երբեւէ չի գերազանցել նախկինում կատարված ջրառը։
Կարդացեք նաև
«15 ջրամբար էիք խոստացել սարքել, սարքեիք՝ Սեւանա լճին հանգիստ թողնեիք»,- ասաց Թագուհի Թովմասյանը։
Խնդիրն «ափալ-թափալ» բերելուն իր ելույթում անդրադարձավ «Հայաստան» խմբակցության անդամ Գեղամ Մանուկյանը՝ հիշեցնելով, որ 2018-ից ի վեր ջրային կոմիտեն եղել է «որբի գլուխ», քանի որ կոմիտեի բազմաթիվ ղեկավարները մտել են աշխատասենյակ ու հազիվ հասցրել են ներքին հեռախոսահամարներին ծանոթանալ՝ արդեն պաշտոնանկ են արվել։ Ջրային կոմիտեի վերջին ղեկավարը երեկ է ազատվել զբաղեցրած պաշտոնից։
Մանրամասները՝ տեսանյութում
Նելլի ԳՐԻԳՈՐՅԱՆ
