Զագրեբում (Խորվաթիա) մեկնարկած ազատ ոճի ըմբշամարտի աշխարհի առաջնության առաջին օրը պայքարի մեջ ներգրավված Հայաստանի ազգային հավաքականի անդամ, 70 կգ քաշային Արման Անդրեասյանը, որի զոհերից մեկը Զագրեբի մրցագորգում ադրբեջանցի Քանան Հեյբատովն էր, այսօր գոտեմարտելու է բրոնզե մեդալի համար: Նրա մրցակիցը լինելու է Ղրղզստանի ներկայացուցիչ Էրնազար Ահմատալիեւը: Հիշեցնենք, որ Արմանը 44-օրյա պատերազմի հերոս Տարոն Անդրեասյանի եղբայրն է:
Ցավոք, մեր երկրորդ ներկայացուցիչը՝ 61 կգ քաշային Մանվել Խնձրցյանը, սփոփիչ գոտեմարտում զիջել է ղազախ մրցակցին եւ զրկվել մեդալի համար պայքարելու հնարավորությունից:
Այսօր մրցագորգ են մտնում մեր եւս երկու ըմբիշներ: 57 կգ քաշային կարգում Արսեն Հարությունյանն արդեն իսկ հասցրել է 10:0 չոր հաշվով հաղթել ուկրաինացի Վլադիսլավ Աբրամովին եւ 1/8 եզրափակչում գոտեմարտելու է Մոնղոլիան ներկայացնող Մունխ Բախտիյագի հետ, իսկ Հրայր Ալիխանյանը 74 կգ քաշային կարգում պայքարը սկսելու է 1/16 եզրափակչից եւ ուժերը չափելու է իրանցի Ալիակբար Էմամիշողաեիի հետ:
Կարդացեք նաև
Աշոտ ՀԱԿՈԲՅԱՆ
