«Մեդիայի հետ կապված մի շատ վատ բան մտքիս եկավ։ Մի պահ մտածում էի՝ էլի ձեզ դատի տամ ու մի մանրապատում հիշեցի։ Ովքեր այս գռեհիկ մանրապատումի բովանդակության հետ իրենց խմբագրությունները կնույնականացնեն, թող անպայմանորեն վիրավորվեն, քանի որ ուզում եմ ձեզ վիրավորել»,- մամուլի ասուլիսի ժամանակ Երևանի քաղաքապետ Տիգրան Ավինյանը թիրախավորեց լրագրողին, որը նրան ԱՆԻՖ-ի հետ կապված հարցեր էր տալիս և լրատվամիջոցին՝ մտահոգություն հայտնելով, թե իր դեմ պատվերով նյութեր են գրում։
Նշենք, որ լրագրողը հետևյալ հարցը տվեց․ «Ձեր դասընկերոջ ընկերությանը ԱՆԻՖ-ից հատկացվել է 960 միլիոն դրամ, իսկ Ձեր կնոջ ընկերուհու ընկերությանը՝ 1,5 միլիոն դրամի ներդրում։ Ինչպե՞ս կարող էիք Դուք՝ որպես ԱՆԻՖ-ի տնօրենների խորհրդի նախագահ, չիմանալ, որ CFW ընկերության բաժնետերերը գրանցված էին ամերիկյան օֆշորներում և միլիոնավոր դրամներ տայիք այդ ընկերություններին, ինչպե՞ս կարող էիք Դուք և պարոն Փաշինյանը չիմանալ, որ ԱՆԻՖ-ում մսխվել են 25 միլիարդ դրամի գումարներ։ 1,5 միլիարդ դրամի մասով կա քննություն, արդյոք Դուք ու Ձեր կինը այդ քննության մասով հարցաքննվե՞լ եք»։
Տիգրան Ավինյանն այս հարցերն անպատասխան թողեց՝ պատճառաբանելով, որ ասուլիսի ընթացքում դրանց արդեն անդրադարձել է, փոխարենը պատմեց «Կարգին հաղորդումից», իր բնորոշմամբ, գռեհիկ մանրապատումը։
Կարդացեք նաև
Լրագրողն էլ ի պատասխան հուշեց Տիգրան Ավինյանին, որ նման հայտարարություններ անցյալ տարի արեց նրա կուսակից ընկեր Արթուր Հովհաննիսյանը, և լրատվամիջոցը, նրան դատի տալով, հաղթեց այդ գործը։
Տաթև ՀԱՐՈՒԹՅՈՒՆՅԱՆ
