Երեւան քաղաքի ընդհանուր իրավասության դատարանի «Կենտրոն» նստավայրում դատավոր Սաթենիկ Անդրեասյանի նախագահությամբ այսօր կայացավ «ՍԴ դատավորների գործ» անունն ստացած հասարակական, քաղաքական գործիչ Էդգար Ղազարյանի դատական նիստը:
Նիստի սկզբում Էդգար Ղազարյանի շահերի պաշտպան Ռուբեն Մելիքյանը միջնորդեց իր պաշտպանյալի նկատմամբ կիրառված երկու խափանման միջոցներից մեկը՝ բացակայելու արգելքը, վերացնել այն հիմքով, որ քրեական հետապնդման ողջ ընթացքում դատարանը հնարավորություն ունեցել է սեփական դիտարկումներ անելու իր պաշտպանյալի վարքագծի հետ կապված առ այն, որ վերջինը այս ընթացքում անգամ որեւէ այնպիսի արտահայտություն չի արել, որպեսզի հանրային մեղադրողը գա եւ կարծիք հայտնի, թե որեւէ ձեւակերպում խախտում է խափանման միջոցները: «Իմ պաշտպանյալը ապացուցել է, որ շատ լավ պատկերացնում է սահմանափակումները»,-ասաց Ռուբեն Մելիքյանը եւ միջնորդեց վերացնել վերականգնել իր պաշտպանյալի ազատ տեղաշարժվելու իրավունքը՝ ամբողջ ծավալով պահպանելով վարչական հսկողությունը:
Կարդացեք նաև
Հանրային մեղադրող Հայկ Ավետյանը նշեց, որ միջնորդությունը պատճառաբանված չէ, անհիմն է եւ դատարանին դիմեց միջնորդությունը մերժելու առաջարկով:
Լսելով դատավարության մասնակիցների կարծիքը՝ դատարանը որոշեց բավարարել պաշտպանի միջնորդությունը՝ ընտրված խափանման միջոցներից վերացնելով բացակայելու արգելքը՝ պատճառաբանությամբ, որ հասել են հիմնական դատալսումների ավարտին, հետազոտվել են ապացույցները, հարցաքննվել է վկա եւ դատարանի գնահատմամբ ըստ էության նվազել է մեղադրյալի՝ իր վրա դրված արդեն իսկ նվազ համարված պարտականությունների չկատարման հավանական ռիսկը:
Աշոտ ՀԱԿՈԲՅԱՆ
