ԵՄ-ն պատրաստ է աջակցել Հայաստանին տրանսպորտի, թվայնացման, առեւտրի, էներգետիկայի եւ ենթակառուցվածքային նախագծերում՝ համահունչ «խաղաղության խաչմերուկ» նախագծին
«Առաջին անգամ է, որ հնարավոր է դարձել Հարավային Կովկասում խաղաղություն բերել, եւ դա է իմ այցի նպատակն ու պատճառը: Խաղաղության գործընկերությունը շատ կարեւոր է, մենք պետք է շարունակենք պահը բաց չթողնել եւ ներդրումներ իրականացնել տրանսպորտի, կապակցվածության, ինչպես նաեւ թվայնացման ոլորտում, նաեւ ժամանակն է խաղաղության գործընթացում ներդրումներ կատարելու»,-լրագրողների հետ հանդիպմանը հայտարարեց Եվրամիության ընդլայնման հարցերով հանձնակատար Մարթա Կոսը՝ նշելով, որ պատրաստ են շարունակելու ՀՀ-ԵՄ գործընկերության մասով ջանքերը:
Ըստ տիկին Կոսի, երբ խոսվում է տնտեսական զարգացումներից, տեսական հարաբերությունների Հայաստան-ԵՄ համագործակցության մասին, հաճախ բոլորս մոռանում ենք՝ թե որքան կարեւոր է ապրել խաղաղության պայմաններում: «Եվրոպան հիմնված է խաղաղության վրա եւ խաղաղության գործընկերն է: Հարավային Կովկասն ու Հայաստանը շատ կարեւոր մաս են այն փոփոխությունների, որոնք փոխելու են Եվրոպայում եւ Հարավային Կովկասում իրավիճակը»,- ասաց նա:
Եվրամիության ընդլայնման հարցերով հանձնակատարը հայտարարեց, որ ԵՄ-ն Հայաստանի համար դիմակայունության եւ աճի ծրագրի երկրորդ փուլի ֆինանսավորումն է հատկացնում։ «Ավելի քան 200 միլիոն եվրոյի մասին է խոսքը, որը կխթանի կապակցվածության, դիմակայունության եւ բիզնեսի զարգացման ոլորտում ներդրումները։ Սա վկայում է Հայաստանի հստակ բարեփոխումների օրակարգին հավատարիմ լինելու մասին։ Սա նաեւ վկայում է ձեր հստակ հանձնառության մասին՝ կարեւոր ոլորտներում բարեփոխումներ իրականացնելուն»,-հայտարարեց Կոսը։
Կարդացեք նաև
Նրա խոսքով՝ ԵՄ-ն պատրաստ է աջակցել Հայաստանին տրանսպորտի, թվայնացման, առեւտրի, էներգետիկայի եւ ենթակառուցվածքային նախագծերում՝ համահունչ «խաղաղության խաչմերուկ» նախագծին։ Ըստ Կոսի ԵՄ-ն ակտիվորեն աշխատում է միջազգային եւ միջտարածաշրջանային կապի օրակարգի մշակման ուղղությամբ՝ Եվրոպան Կենտրոնական Ասիայի հետ կապելով նաեւ Հարավային Կովկասի, այդ թվում՝ Հայաստանի միջոցով։
