Aravot.am-ի տեղեկություններով, սեպտեմբերի 23-ին ոստիկանության կազմակերպված հանցագործության դեմ պայքարի վարչությունում ստացված օպերատիվ տեղեկությունների հիման վրա ձեռնարկված միջոցառումների շնորհիվ՝ տվյալներ են ձեռք բերվել այն մասին, որ Ռ. Հ.-ն, 2021թ․ նոյեմբեր ամսից մինչև 2022թ․ հունվարի 11-ն ընկած ժամանակահատվածում զբաղեցնելով Արարատի մարզի համայնքներից մեկի ղեկավարի պաշտոնակատարի պաշտոնը՝ խախտելով ՀՀ հողային օրենսգրքի 60-րդ հոդ․ 10-րդ մասով սահմանված՝ քաղաքացիներին եւ իրավաբանական անձանց սեփականության իրավունքով համայնքային սեփականություն հանդիսացող ընդհանուր օգտագործման արոտավայրեր փոխանցելու արգելքը, ընդհանուր օգտագործման 3 արոտավայրերը աճուրդային եղանակով օտարել է 3 ֆիզիկական անձանց՝ ընդամենը շուրջ 399.000 դրամ արժեքով:
ՀՀ կադաստրի կոմիտեի իրավասու պաշտոնատար անձինք էլ կատարել են նշված գործարքների պետական գրանցումը, որի արդյունքում պետությանը պատճառվել է առանձնապես խոշոր չափերի գույքային վնաս:
Առերեւույթ հանցանքի մասին կազմված հաղորդումն ու կից փաստաթղթերն ուղարկվել են ՀՀ հակակոռուպցիոն կոմիտե՝ քրեական վարույթ նախաձեռնելու հարցը որոշելու համար։
