«Փաստինֆո». ԱՆԻՖ-ում հավակնոտ ծրագրեր կային, որոնց իրականացման դեպքում ԱՆԻՖ-ն ամբողջությամբ դառնալու էր ինքնաբավ, սակայն դրանք հնարավոր չի եղել ի կատար ածել՝ ընկերության խորհրդում փոփոխություններ իրականացնելու, տնօրենին փոխարինելու պատճառով, ըստ էության, այդ ամեն ինչը գնացել է ձախողման։ Այս մասին հրավիրված ասուլիսում ասաց ԱՆԻՖ-ի նախկին տնօրեն Դավիթ Փափազյանի փաստաբան Հակոբ Ենոքյանը։
Նրա խոսքով՝ ԱՆԻՖ-ի՝ պետությանը պատկանող բաժնեմասի վերահսկողությունը տարբեր ժամանակներում տարբեր գերատեսչությունների է վերապահվել։
«Մի շրջանում վարչապետի աշխատակազմինն է եղել, իսկ վերջում փոխանցվել է Էկոնոմիկայի նախարարությանը, նախարար Քերոբյանի նախաձեռնությամբ խորհրդի կազմը փոխվել է։ Տնօրենին ապօրինի կերպով աշխատանքից ազատել են, ինչը հաստատվել է դատարանի վճռով։ Նոր ղեկավարության պայմաններում ոչ միայն ընթացիկ ծրագրերը սկսեցին ձախողվել, այլ նաև նախկինում նախատեսված ծրագրերը, որոնք պետք է իրականացվեին»։
Փաստաբանի խոսքով՝ այդ ամենի հետևանքով ստեղծվել է մի իրավիճակ, որ ԱՆԻՖ-ը գնում է դեպի փակման, այս պահին կառավարվում է Պետական գույքի կառավարման կոմիտեի կողմից, ոչ մի ծրագիր չկա։
