Ս.թ. սեպտեմբերի 19-ին Երեւանում կայացած հանդիպման ժամանակ Եվրոպական միության ընդլայնման եւ Արեւելյան հարեւանության հարցերով հանձնակատար Մարթա Կոսն ու Հայաստանի Հանրապետության փոխվարչապետ Մհեր Գրիգորյանը վերահաստատել են ԵՄ-ի եւ Հայաստանի միջեւ աճող գործընկերությունը շարունակելու իրենց համատեղ հանձնառությունը։
«ԵՄ-ն եւ Հայաստանը երբեք այսքան մոտ չեն եղել, որքան հիմա։ Հանձնակատար Կոսի առաջին այցը Հայաստան նշանավորում է երկկողմ հարաբերություններում աննախադեպ դինամիկ պահ։ Նա ողջունել է Հայաստանի քայլերը՝ գործընկերությունը խորացնելու ուղղությամբ», – ասվում է Հայաստանում ԵՄ պատվիրակության մամուլի հաղորդագրության մեջ։
Հանձնակատար Կոսը ողջունել է Հայաստան-Ադրբեջան հարաբերությունների կարգավորման գործընթացում վերջերս՝ 2025 թվականի օգոստոսին Վաշինգտոնում ձեռք բերված առաջընթացը: Նա ընդգծել է, որ խաղաղության համաձայնագրի նախաստորագրումը մեծ քայլ է դեպի երկու երկրների միջեւ եւ ամբողջ տարածաշրջանում հարատեւ եւ կայուն խաղաղություն եւ վերահաստատել, որ Եվրոպական միությունը պատրաստ է շարունակելու աջակցել խաղաղության հաստատմանը եւ ներդրումներ կատարել տարածաշրջանային միակցվածության մեջ՝ նպաստելով տարածաշրջանում կայուն խաղաղությանը, կայունությանը եւ բարգավաճմանը:
Հանձնակատար Կոսը նաեւ ողջունել է Թուրքիայի հետ հարաբերությունների կարգավորմանը նպաստելու ուղղությամբ Հայաստանի շարունակական ջանքերը։
Կարդացեք նաև
Հանդիպման ընթացքում հանձնակատար Կոսը հայտարարել է Եվրոպական հանձնաժողովի նախագահ Ուրսուլա ֆոն դեր Լայենի կողմից 2024 թվականի ապրիլին հայտարարված՝ Հայաստանին աջակցելու համար նախատեսված 270 միլիոն եվրոյի «Դիմակայունություն եւ աճ» ծրագրի երկրորդ մասնաբաժնի (202,5 միլիոն եվրո) հաստատման մասին։ Սա ՀՀ-ԵՄ նոր գործընկերության օրակարգում սահմանված հավակնոտ ռազմավարական առաջնահերթությունները կդարձնի գործողություններ։
Այս երկրորդ մասնաբաժնի շրջանակներում ԵՄ-ն առաջ է բերում 90 միլիոն եվրոյի համապարփակ բազմաոլորտային բյուջետային աջակցություն: Այս ծրագիրը կխթանի առեւտրի դիվերսիֆիկացման, տրանսպորտի, էներգետիկայի, մուտքի արտոնագրերի ազատականացման երկխոսության շրջանակներում հիմնական ոլորտների, ինչպես նաեւ կրթության եւ զբաղվածության ոլորտներում հիմնական ոլորտային բարեփոխումները՝ անդրադառնալով նաեւ խոցելի խմբերին, այդ թվում՝ փախստականներին՝ նպաստելով Հայաստանի սոցիալ-տնտեսական դիմադրողականության խթանմանը։
Դրա արդյունավետ իրականացումն ապահովելու համար հանձնակատար Կոսը եւ փոխվարչապետ Գրիգորյանը մեկնարկել են բարձր մակարդակի քաղաքականության երկխոսություն: Սա կլինի բարեփոխումների թիրախների առաջընթացի համակարգման եւ մոնիթորինգի հարթակ: Այն կղեկավարվի փոխվարչապետի գրասենյակի կողմից՝ համապատասխան նախարարությունների եւ ԵՄ-ի հետ համատեղ:
ԵՄ-ն եւ Հայաստանը վերահաստատեցին իրենց համատեղ հանձնառությունը ժողովրդավարական արժեքներին եւ եվրոպական լավագույն փորձին: Այս համատեքստում Հայաստանը վերահաստատեց իր վճռական պատրաստակամությունը՝ հասնելու մուտքի արտոնագրերի ազատականացման գործողությունների ծրագրում (VLAP) սահմանված չափանիշներին:
Հանձնակատար Կոսը նաեւ հայտարարեց ընտրական գործընթացների թափանցիկության ապահովման լրացուցիչ աջակցության մասին՝ 2026 թվականի խորհրդարանական ընտրություններին ընդառաջ:
ԵՄ-ն եւ Հայաստանը կշարունակեն համագործակցել նաեւ «Գլոբալ դարպասներ» (Global Gateway) ռազմավարության շրջանակում գործընկեր միջազգային ֆինանսական հաստատությունների հետ՝ ներառական աճը եւ միակցվածությունը խթանող առաջնահերթ ներդրումները առաջ մղելու համար: 2021 թվականից ի վեր, «Գլոբալ դարպասներ» ռազմավարության շրջանակներում ԵՄ ներդրումները Հայաստանում նախատեսվում է հասցնել 2,5 միլիարդ եվրոյի։
Այս համատեքստում հանձնակատար Կոսը նաեւ ներկայացրեց ԵՄ միջտարածաշրջանային կապի օրակարգի զարգացումները, որը Եվրոպան կապում է Կենտրոնական Ասիայի հետ՝ Հարավային Կովկասի եւ Թուրքիայի միջոցով: Այս նախաձեռնությունը կլինի ԵՄ Սեւծովյան ռազմավարության առաջատարը եւ ընդգծում է Հայաստանի դերը տարածաշրջանային միակցվածության մեջ:
Վերջապես, հանձնակատար Կոսը եւ փոխվարչապետ Գրիգորյանը փաստեցին, որ ս.թ. սեպտեմբերի 19-ի հանդիպումը կարեւոր քայլ էր ՀՀ-ԵՄ հարաբերություններում եւ կոչ արեցին կատարել մինչ այժմ գրանցված առաջընթացի վերանայում 2025 թվականի դեկտեմբերի սկզբին Բրյուսելում կայանալիք ԵՄ-ՀՀ Գործընկերության խորհրդի հաջորդ նիստում։
EU NEIGHBOURS east
