«Այս սեզոնին հատկապես կարեւորում ենք գրիպի դեմ պատվաստումների իրականացումը, որն արդեն 2-3 շաբաթ է՝ մեկնարկել է ամբողջ Հայաստանի Հանրապետությունում: Գրիպի դեմ պատվաստանյութերը հասանելի են ՀՀ առաջնային պահպանման բոլոր բուժհաստատություններում: Պլանային կարգով հատկապես առաջնահերթություն տալով խոցելի խմբերի ներկայացուցիչներին, բոլոր այն անձանց, որոնք ցանկանում են պատվաստվել գրիպի դեմ, կարող են մոտենալ պոլիկլինիկա եւ պատվաստվել »,- «Արմենպրեսի» մամուլի սրահում կայացած ասուլիսում ասաց ՀՀ ԱՆ Հիվանդությունների վերահսկման եւ կանխարգելման ազգային կենտրոնի գլխավոր տնօրենի տեղակալ Զարուհի Գրիգորյանը:
Զարուհի Գրիգորյան
ՀՀ ԱՆ Հիվանդությունների վերահսկման եւ կանխարգելման ազգային կենտրոնի իմունականխարգելման վարչության պետ Սվետլանա Գրիգորյանն էլ նշեց, որ սեզոնային գրիպի դեմ պատվաստումները նախատեսված են առաջնահերթ ռիսկի խմբերի անձանց համար. «Ռիսկի խմբերն են 6 ամսեկանից 5 տարեկան երեխաները, ուղեկցող հիվանդություններ ունեցող անձինք, հղիները, 65 տարեկանից բարձր տարիքի անձինք, ինչպես սոցիալական խնամքի կենտրոնների շահառուները, այնպես էլ աշխատակիցները, զորակոչի ենթակա անձինք եւ բուժաշխատողները»:
Սվետլանա Գրիգորյան
Սվետլանա Գրիգորյանը հավելեց, որ սեզոնային գրիպի դեմ պատվաստումները կարելի է իրականացնել այլ պատվաստանյութերի հետ միասին, եթե օրացուցային ժամկետում նախատեսված պատվաստումներ կան, ապա համատեղ կարելի է դրանք կիրառել:
Զարուհի Գրիգորյանի խոսքով. «Յուրաքանչյուր տարի մոտ 200 հազար դեղաչափ պատվաստումներ են իրականացվում՝ նշված խոցելի խմբերի շրջանում: Այս միտումը գնալով ակտիվանում է: Մարդկանց մոտ բարձրանում է հետաքրքրվածությունը եւ պահանջարկը՝ գրիպի դեմ պատվաստումների»:
Կարդացեք նաև
Սվետլանա Գրիգորյանը փաստեց, որ երկու շաբաթվա ընթացքում բաշխված պատվաստանյութերի 20 %-ն արդեն իսկ ծախսվել է:
Մանրամասն՝ տեսանյութում
Գոհար ՀԱԿՈԲՅԱՆ
