Պաշտպանության նախարարության (ՊՆ) շենքի դիմաց անհետ կորած զինվորների հարազատների բողոքի ցույցը շարունակվում է: Ցուցարարներից 44-օրյա պատերազմում անհետ կորած Սարգիս Ղուկասյանի հորեղբոր՝ Արսեն Ղուկասյանի ինքնազգացողությունը քիչ առաջ կտրուկ վատացավ, «շտապ օգնություն» կանչեցին: Ցուցարարներին դեռ չի հաջողվել հանդիպել Զինված ուժերի գլխավոր շտաբի պետի կամ բարձրաստիճան այլ զինվորականների հետ: Սակայն նրանք դեռ չեն պատրաստվում հեռանալ:
Ղուկասյանին այսօր շատ էր զայրացրել այն փաստը, որ ցուցարարներին պատրաստ է հանդիպել ՊՆ փոխնախարար Արման Սարգսյանը: Արսեն Ղուկասյանը ՊՆ աշխատակիցների հետ թեժ վիճաբանողներից էր: Նա լրագրողների հետ զրույցում ասաց. «Որոշել են, որ մեզ՝ երեք ծնողիս կընդունի Արման Սարգսյանը: Բայց նախորդ օրը՝ ակցիայի ժամանակ, ես մեքենայով Արման Սարգսյանի դիմացն եմ կանգնել, իրեն տեղեկացրել եմ՝ հեսա գալիս ենք: Ծնողներով ակցիա ենք անելու, թողել, քշել, գնացել է: Մեզ այդ օրն ասել են՝ կունենաք հանդիպում ձեր ուզած մարդկանց հետ, ինձ երաշխավորել են, որ կհանդիպենք մեր ուզած մարդկանց հետ: Իսկ այսօր տեսանք՝ հենց շտաբի աշխատողները փորձեցին ընդհարում սարքել, որ դառնա անկառավարելի, բախում ծնողների հետ, որ ուժ կիրառելով՝ նստեցնեն, տանեն, հարցը փակեն այդ ձեւով»:
Կարդացեք նաև
Արսեն Ղուկասյանի խոսքով՝ կոնկրետ խուսափում են իրենց հետ հանդիպումից, որովհետեւ գիտեն՝ իրենց ունեցած տեղեկատվությունն այնքան է, որ իրենց տված հարցերին չեն կարողանա պատասխաններ տալ. «Որ չհայտնվեն վատ վիճակում, խուսափում են»:
Պարոն Ղուկասյանն այսօր ավելի վաղ հայտնել էր, որ փողոց են պատրաստվում փակել. «Այս ամեն ինչը մեր երեխեքի համար ենք անում, մեր երեխեքի ճակատագրի համար ենք անում: Այն կառույցը, որ զորակոչել, տարել է երեխեքին բանակ, ձեռքերը լվացել է; Տարան, կորցրին երեխեքին, հետեւներից չգնացին, միջոցներ չձեռնարկեցին, որ բերեին»:
Շտապ բժշկական օգնություն ստանալուց հետո պարոն Ղուկասյանը կրկին խոսեց լրագրողների հետ:
Անդրադառնալով փողոց փակելու որոշմանը՝ ասաց՝ էլի կփակեն, բայց ուզում են սպասել, գուցե պաշտոնյաների ողջամտությունը արթնանա. «Էդ երեխեքի ճակատագրով վերջը մեկը պե՞տք է զբաղվի, թե՞ ոչ: Ոնց նայում ենք, զբաղվող չկա: Էն ժամանակ խորհրդարանում Անդրանիկ Քոչարյանին ասում էինք՝ քննի, ճշտի. իմացա՞ք՝ ով էր դավաճանը, ով սրիկան, ով էս երկիրն ու երեխեքին ծախեց»:
Արփինե ՍԻՄՈՆՅԱՆ
