«Եռաբլուրում եւ պատերազմին առնչվող խորհրդանշական սրբավայրերում մենք լինում ենք շատ հաճախ՝ նաեւ առանց կոնկրետ օրերի: Եվ ես չեմ ուզում, որ սա մենք դարձնենք քաղաքական օրակարգ: Այցեր պարբերաբար լինում են Եռաբլուր նաեւ առանց տեսախցիկների»,-լրագրողների հետ ճեպազրույցում ասաց ՔՊ-ական պատգամավոր, ԱԺ տարածաշրջանային եւ եվրասիական ինտեգրման մշտական հանձնաժողովի նախագահի տեղակալ Վաղարշակ Հակոբյանը՝ պատասխանելով հարցին, թե ինչու իշխանական որեւէ ներկայացուցիչ սեպտեմբերի 27-ին Եռաբլուր չայցելեց: «Ես չեմ ուզում, որ այս հարցը քաղաքականացնենք»,-ասաց նա:
Վաղարշակ Հակոբյան
Դիտարկմանը, թե, ըստ էության, հնարավոր չէ, պատկերացնել Նիկոլ Փաշինյան եւ առանց «reel» ինչ-որ այց, բայց, այնուամենայնիվ, վերջին անգամ ե՞րբ է վարչապետը կամ թիմը գնացել Եռաբլուր կամ, ինչպես ինքն է ասում, պատերազմի հետ կապված այլ խորհրդանշական վայրեր, ՔՊ-ականը պատասխանեց. «Վարչապետի այցերի մասին դուք տեղեկատվություն կարող եք ստանալ իր մամուլից, մամուլի պատասխանատուներից, մամուլի հաղորդագրություններից: Խմբակցության մասով մենք եւս ունենք մամուլի պատասխանատուներ, ովքեր դրանով զբաղվում են: Ես չեմ կարող այստեղ նշել, թե մենք ուր ենք գնում, որտեղ են բոլորն անցկացրել իրենց ամառային արձակուրդները կամ ձմեռային հանգիստը, ես չեմ կարող ձեզ տեղեկացնել, թե առաջիկա տոներին ով՝ ուր է պատրաստվում գնալ»:
Երբ լրագրողները պատգամավորին հիշեցրին, որ սեպտեմբերի 27-ը տոն չէ, այլ հիշատակի օր է, Վաղարշակ Հակոբյանը հավաստիացրեց. «Դուք առաջիկայում կտեսնեք, որ այդ օրակարգը եւս կեղծ է, որովհետեւ սեպտեմբերի 27-ի հետ կապված այժմ նաեւ գործընթացներ կան եւ երբ ինչ-որ մի բան շրջանառվի, դուք կտեսնենք: Ես չեմ ուզում հիմա դրա մասին խոսել»:
Աշոտ ՀԱԿՈԲՅԱՆ
