Սեպտեմբերի 27-ին Լեհաստանի Կատովիցե քաղաքում Հայկական մշակույթի 4-րդ փառատոնի շրջանակներում տեղի ունեցավ «ՎԿԱՆԵՐ. փաստագրելով հանցագործությունը` Հայոց ցեղասպանության ականատես վավերագրողները» խորագրով ցուցադրության բացումը՝ նվիրված Հայոց ցեղասպանության 110-րդ տարելիցին և Լեհաստանի Հանրապետության Սեյմի որոշման 20-ամյակին, որով դատապարտվել է Հայոց ցեղասպանությունը:
Ցուցադրությունը պատրաստվել է Հայոց ցեղասպանության ինստիտուտ-թանգարանի համագործակցությամբ` Հայոց ցեղասպանության 110-րդ տարելիցի միջոցառումների շրջանակում (հայերեն և լեհերեն)։ Այն ներկայացնում է միսիոներների, բժիշկների, դիվանագետների և ռազմական գործիչների վկայությունների լայն հավաքածու, որը փաստագրում է Հայոց ցեղասպանությունը և ցուցադրում դրա մասշտաբները, ինչպես նաև լուսաբանում է այն մարդասիրական գործողությունները, որոնք իրականացվել են այդ սարսափելի հանցագործության ընթացքում։
Ցուցադրության բացմանը հաջորդեց Հայոց ցեղասպանության 110-րդ տարելիցին նվիրված «Լեհաստանի հայ փոքրամասնության պատմական հիշողությունը» խորագրով գիտաժողովը:
Հայոց ցեղասպանության թանգարան-ինստիտուտը շնորհակալություն է հայտնում Լեհաստանում ՀՀ պատվավոր հյուպատոս Հրաչյա Բոյաջյանին` ցուցադրության կազմակերպման և արդյունավետ համագործակցության համար:
Կարդացեք նաև
Հայոց ցեղասպանության թանգարան-ինստիտուտ
