Ավելի քան 3 ամիս առաջ «Հրապարակը» գրեց, որ աղմկահարույց ձերբակալություն է տեղի ունեցել «Զվարթնոց» օդանավակայանում, որը փորձել են գաղտնի պահել։ ՀՀ դիվանագիտական կորպուսի աշխատակից, Ավստրիայում նոր-նոր հյուպատոս նշանակված Աշխեն Ալեքսանյանին Հայաստան վերադառնալիս ձերբակալել էին:
Երիտասարդ կնոջ մոտ փաստաթղթեր էին հայտնաբերել եւ կասկածել Ադրբեջանի օգտին լրտեսություն իրականացնելու մեջ։ Դրանից հետո ԱԱԾ-ն մի ամբողջ օր խուզարկություն էր իրականացրել ԱԳՆ շենքում` համակարգիչներն էին ուսումնասիրվել, փաստաթղթեր էին զննվել ու առգրավվել։
Աշխեն Ալեքսանյանի նկատմամբ խափանման միջոց է ընտրված կալանավորումը։ Մենք տեղեկացանք, որ գործով միակ մեղադրյալն ԱԳՆ-ի աշխատակից Ա․ Ալեքսանյանն է, գործով Քննչական կոմիտեն արդեն նախաքննության ավարտ է հայտարարել եւ այն ուղարկել դատախազություն՝ հաստատելու, որից հետո էլ կուղարկվի դատարան՝ քննության։
Ալեքսանյանի պաշտպանները` Աբգար Պողոսյանն ու Տավրոս Գեւորգյանը, հրաժարվեցին պատասխանել մեղադրանքի, քրեական գործի վերաբերյալ հարցերին, Աբգարյանն ասաց՝ իր պաշտպանյալը մեղքը չի ընդունում, Գեւորգյանն էլ հայտնեց, որ կալանքի որոշումը բողոքարկել են վերադաս ատյան, դեռ նորություն չկա։ Այս քրեական գործը, ըստ էության, դատարանում քննվելու է դռնփակ կարգով, քանի որ քրգործը պետական դավաճանությանն է վերաբերում։
Աննա ՊԱՊԻԿՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
