Եվրոպական խորհրդարանի պատգամավոր Ֆերնան Կարտհայզերը (Լյուքսեմբուրգ) հրատապ գրավոր հարցումներ է ուղարկել Եվրոպական հանձնաժողովին՝ հետաքրքրվելով, թե` հնարավո՞ր է արդյոք ԵՄ ներկայացուցիչներ ուղարկել Բաքու՝ հետևելու հայ գերիների դատավարական ընթացքներին։
Ամբողջական հարցադրումը հետևյալն է․
«Ադրբեջանը վերջերս հրահանգել է փակել ԿԽՄԿ Բաքվի գրասենյակը, որը միակ միջազգային կառույցն էր, որ պարբերաբար մուտք ուներ հայ պահվող անձանց մոտ։ Այս քայլով փաստացի վերացվել է նրանց պահման պայմանների արտաքին հումանիտար մոնիթորինգը։
Վստահելի տեղեկությունները վկայում են նաև մի շարք պահվողների առողջական վիճակի վատթարացման, համապատասխան բժշկական օգնության մերժման, ընտանիքների հետ կապի բացակայության, մեկուսացված պահման, ինչպես նաև քաղաքական շարժառիթներով և կեղծ մեղադրանքներով դատավարությունների մասին։ Չնայած դրան, Բելգիայում անցած ապրիլին կայացած խորհրդարանական լսումների ժամանակ Ադրբեջանի դեսպանը հայտարարել է, որ հայ պահվողների դատավարությունները բաց են Բաքվում գործող բոլոր օտարերկրյա դիվանագետների համար։
Կարդացեք նաև
Սեպտեմբերին Հայաստանի արտգործնախարարը շեշտել է, որ գերիների հարցը շարունակում է մնալ չլուծված, և նրանց ազատ արձակման ապահովումը հիմնական հումանիտար առաջնահերթություն է։ Այս հարցը ոչ թե խոչընդոտում, այլ նպաստում է խաղաղության գործընթացին։
Հաշվի առնելով այս զարգացումները և ԵՄ միջնորդական դերը տարածաշրջանում, ի՞նչ կոնկրետ քայլեր է ձեռնարկելու Հանձնաժողովը՝
Ապահովելու համար, որ ԵՄ պատվիրակության ներկայացուցիչը Բաքվում (կամ այլ միջազգային դիտորդ) ներկա լինի հայ գերիների առաջիկա դատավարություններին,
Նպաստելու համար շտապ և անկախ բժշկական հետազոտություններին՝ ռիսկի տակ գտնվող գերիների համար,
Տրամադրելու համար հստակ ժամանակացույց, թե երբ է Հանձնաժողովը հրապարակայնորեն զեկուցելու այս քայլերի և Ադրբեջանի կողմից միջազգային պարտավորություններին համապատասխանելու մասին»։
Եվրոպայի Հայ դատի հանձնախմբի գրասենյակ
