-Այսօր կրիտիկական մետաղների պահանջարկն աշխարհում զարգանում է, դա իր պիկին է հասնելու մոտ 2040 թվականին: Այսօր Հայաստանի հանքարդյունաբերական ֆորումի ժամանակ ասաց Զանգեզուրի պղնձամոլիբդենային կոմբինատի (ԶՊՄԿ) ջրային ռեսուրսների եւ հիդրոտեխնիկական կառույցների կառավարման բաժնի ղեկավար Արմենակ Սահակյանը:
Նրա խոսքով՝ կրիտիկական մետաղների պահանջարկի զարգացմանը զուգահեռ սկսել է երկրաբանահետախուզական աշխատանքների իրականացում. «Օրինակ 2022-ին մոտ 2200 կազմակերպություն ներդրել է մոտ 13 միլիարդ դոլար երկրաբանահետախուզական աշխատանքներ իրականացնելու համար: Այդ աշխատանքների իրականացման արդյունքում ձեւավորվել են նոր հանքավայրեր, հանձնվել են շահագործման: Իսկ դրանք իրենց հերթին բերելու են նոր պոչամբարների կառուցման, իսկ արդեն իսկ գոյություն ունեցողների դեպքում այդ պոչամբարների ընդլայնման: Քանակի հետ մեծանալու են հնարավոր ռիսկերը՝ պոչամբարների կայունության, փլուզման ու դրանց ռիսկերի կառավարման հետ կապված: Պղնձի հետ կապված կանխատեսումների համաձայն՝ առաջիկայում յուրաքանչյուր տարի մոտ 2 քկմ-ով մեծանալու է պոչամբարների մակերեսը միայն պոչանքը տեղադրելու համար»:
Սահակյանի խոսքով՝ վերջին տարիներին պոչամբարների փլուզման դեպքերի աճ է գրանցվել. «Այսօր գլխավոր մարտահրավերներից է այն, որ անհրաժեշտ է կառուցել այնպիսի պոչամբարներ, որոնք կհամապատասխանեն միջազգային ստանդարտներին եւ տեխնիկապես կիրառելի կլինեն»:
Կարդացեք նաև
Սահակյանը անդրադարձավ նաեւ ԶՊՄԿ-ի 4-րդ՝ Արծվանիկի պոչամբարին, որը գտնվում է Կապանում, ծովի մակարդակից 940մ բարձրության վրա, զբաղեցնում է 630 հա տարածք, նախատեսում է տեղադրել եւս 238 միլիոն խմ պոչանք՝ վերընթաց տիպով:
Արփինե ՍԻՄՈՆՅԱՆ
