«Նիկոլ Փաշինյանը Երրորդ հանրապետությունը թաթախել է արյան մեջ, իրեն թվում է՝ եթե անունը փոխի, ստեղծի Չորրորդ հանրապետություն, մաքրվում է այդ ամենից եւ պուպուշ-պուպուշ մտնում է նոր հանրապետություն»,- այսօր հրավիրած ասուլիսում ասաց ՀՀ երկրորդ նախագահ Ռոբերտ Քոչարյանը։
«Բայց դրան զուգահեռ` պատերազմ հայտարարել Արարատ սարին, մեր ինքնությանն ու մեր արժեքային համակարգին, սա էլ ընտրազանգվածի առումով ռացիոնալ չէ։ Դրա համար պետք է Ֆրեյդի տեսանկյունից վերլուծել, ուղղակի հոգեբանության մեջ խորանալ եւ հասկանալ, որ էս մարդը խորը ներսում իր արած ղալլաթները լավ է հասկանում։ Հիմքերն են քանդում, եթե այսպես շարունակվի, եւ հանկարծ ժողովուրդը սկսի այս թեզերն ընդունել, Հայաստանում 1 մլն մարդ է մնալու՝ անճարները։ Եթե Հայաստանի ղեկավարը լիներ թուրքական գործակալ, կաներ ճիշտ այն, ինչ արվում է։ Հիմա չեմ ասում՝ գործակալ է, ես համարում եմ, որ հոգեբանական բարդույթներ հաղթահարելու պրոբլեմի մեջ է։ Ամբողջ երկրով մեկ, ժողովրդով մենք սրա դարդն ենք քաշում, էս ինչ է անում էս մարդը»,- ասաց նա։
Մանրամասները՝ տեսանյութում
Կարդացեք նաև
Ռոբերտ Քոչարյանն ասաց, որ չի հասկանում, թե ինչի համար են այս հարձակումները Եկեղեցու դեմ։ Եկեղեցու դեմ ՀՀ իշխանությունների պայքարը, նրա խոսքով, դարձյալ մեր ինքնության դեմ պայքարի շարքից է։ «Երբ ինքը սկսեց եկեղեցական տոների ժամանակ սաղմոսներ կարդալ, ես արդեն սպասում էի, որ հեսա հերթը գալու է Վեհափառին եւ սրբազաններին։ Ինքն ուզում է, որ Վեհափառի տեղը մեկը լինի, ով կենթարկվի պետությանը, ինքը համարում է, որ չպիտի լինի ինստիտուտ, որը կարող է ինքնուրույն կարծիք ունենալ, չպիտի լինի ինստիտուտ, որն ազգային ինքնության ֆունդամենտալ գործոններից մեկն է։ Քանի որ ազգային ինքնությունը պետք է փոխել, քանի որ կա Չորրորդ հանրապետության գաղափարը, ուրեմն պետք է նաեւ եկեղեցին մաքսիմալ ձեւով թուլացնել։ Տրամաբանական շղթան սա է, ես այլ բացատրություն չեմ գտնում»,- ասաց նա։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
