«Այո երկար ճանապարհ է, բայց մենք տեսել ենք արդեն երկար ժամանակաշրջան, որը խաղաղ է, որը բոլորիս հույս է տալիս եւ համոզված եմ, որ կհասնենք խաղաղության»,- Սյունիքում լրագրողների հետ զրույցում ասաց Հայաստանում Գերմանիայի դեսպան Կլաուդիա Բուշը։
Լրագրողներից մեկը նկատեց՝ Գերմանիայի կառավարությունը հայտարարել է, որ աջակցում է Հայաստանի եւ Ադրբեջանի միջեւ խաղաղության գործընթացին եւ հետաքրքրվեց՝ ի՞նչ է այդ խաղաղությունը, եթե Հայաստանն ամեն օր Ադրբեջանից սպառնալիքներ է ստանում։
«Կարեւոր է այստեղ (Սյունիքում-Ն․ Գ․) լինել եւ հանդիպել մարդկանց հետ, ովքեր եկել են Լեռնային Ղարաբաղից, նրանց ովքեր նոր տուն են գտել Հայաստանում»,- ասաց տիկին դեսպանը։
Նա հաստատեց՝ Գերմանիայի կառավարությունը շատ ներգրավված է եղել խաղաղության բանակցություններում․ «Բեռլինում հանդիպումներ ենք կազմակերպել, ծառայություններ ենք մատուցել, որոնց համար Հայաստանի եւ Ադրբեջանի կառավարությունները շատ երախտապարտ են եղել։ Հիմա պետք է դեպի ապագա նայենք եւ տեսնենք, թե հաջորդ քայլերը որոնք են։ Մենք տեսել ենք առաջընթաց Վաշինգտոնում։ Գերմանիայի կառավարությունը պատրաստ է շարունակել աջակցել այն քայլերին, որոնք շուտով կձեռնարկվեն։ Մենք դա անում ենք Հայաստանի կառավարության հետ միասին։ Ես գիտեմ նաեւ, որ իմ գործընկերը նույնը անում է Բաքվում»։
Կարդացեք նաև
ԵՄ պատվիրակության ղեկավարը եւ Հայաստանում հավատարմագրված եվրոպական երկրների դեսպաններն այս օրերին Սյունիքի մարզում են՝ ծանոթանալու «Դիմակայուն Սյունիք» ծրագրի ընթացիկ եւ ամփոփիչ արդյունքներին։ Ծրագրի շրջանակներից դուրս այլ հարցերի դեսպանները չցանկացան պատասխանել։
Նելլի ԳՐԻԳՈՐՅԱՆ
