Թուրքիայում օրեցօր թեժացող քաղաքական իրավիճակի ֆոնին նոր սկանդալ է հասունանում. Ստամբուլի նախկին քաղաքապետ, գլխավոր ընդդիմադիր ուժ համարվող «Ժողովրդահանրապետական կուսակցության» անդամ Էքրեմ Իմամօղլուն և ընդդիմադիր տեսակետներ ներկայացնող «TELE1» հեռուստաալիքի գլխավոր խմբագիր Մերդան Յանարդաղը մեղադրվում են «լրտեսության» մեջ։
Հոկտեմբերի 23-ի առավոտյան ոստիկանության ահաբեկչության դեմ պայքարի (TEM) բաժնի աշխատակիցները ներխուժել են «TELE1-ի» շենք և խուզարկել այն՝ այդ թվում Յանարդաղի աշխատասենյակը։ Ապա լրագրողը ձերբակալվել է իր տանը՝ «լրտեսության» մեղադրանքով։
«Առավոտյան կողմնացույց» հաղորդման վարող Գյոքհան Քայըշը դեպքի մասին հայտնել է ուղիղ եթերում՝ նշելով, որ գործողությունը կատարվել է Ստամբուլի գլխավոր դատախազության որոշմամբ, որի փաստաթղթում նշված է եղել «Օպերացիա 1» ձևակերպումը, ինչը կարող է վկայել հետագա նոր գործողությունների մասին։
Միաժամանակ, դատախազությունը հայտարարել է, որ Էքրեմ Իմամօղլուի նկատմամբ ևս սկսվել է «օտար երկրների օգտին լրտեսություն իրականացնելու» գործ, և նա շուտով կներկայանա հարցաքննության։
Կարդացեք նաև
Ըստ պաշտոնական հաղորդագրության՝ գործը կապվում է ավելի վաղ ձերբակալված Հյուսեյին Գյունի հետ, որի թվային տվյալներում հայտնաբերվել են ռազմական բնույթի գաղտնի լուսանկարներ և օտար հետախուզական ծառայությունների հետ կապերի վկայություններ։ Քննիչների պնդմամբ՝ Իմամօղլուի թիմը հավաքագրել և փոխանցել է ընտրական տվյալներ հօգուտ օտար երկրների։
Հավելենք, որ այս պահին Էքրեմ Իմամօղլուն շարունակում է մնալ կալանքի տակ՝ 2025-ի մարտից ի վեր, իսկ «TELE1»-ում ընթացող խուզարկությունները դեռևս շարունակվում են։
Աղբյուր՝ Ermenihaber.am/Diken, Rudaw
