– Եթե հոկտեմբերի 27-ը չբացահայտվի, մեր պետությունը ապագա չի կարող ունենալ,- այսօր՝ Հոկտեմբերի 27-ի ոճրագործության 26-րդ տարելիցին, Եռաբլուրում լրագրողների հետ զրույցում ասաց ԵԿՄ նախագահ Սասուն Միքայելյանը:
Նրա խոսքով, Հոկտեմբերի 27-ին ոչ թե կառավարության ղեկավարությունը գլխատվեց, այլ խարխլվեց մեր պետականությունը. «Եթե Վազգենը կենդանի լիներ, Ղարաբաղի հետ կապված նման բան չէր կարող լինել»
-Այս տարիների ընթացքում նախորդներն էլ եկան ալան-թալանով զբաղվեցին, երկիրն էս վիճակն ընկավ: Արցախն էլ կորցրեցինք, բայց երբեք չեմ հուսահատվում: Մեր գերխնդիրն է բանակի կողքին լինել, համախմբված լինել,- հավելեց Միքայելյանը:
Անդրադառնալով՝ կառավարության որոշմանը, որով կրճատվել է պարտադիր զինվորական ծառայության ժամկետը՝ 2-ից, 1,5 տարվա ժամկետով, Միքայելյանն ասաց. «Չեմ կարող գնահատական տալ՝ որն է ճիշտ, որը՝ սխալ: Ժողովրդի մեծամասնությունը կողմ է, մարդիկ կան դեմ են: Պրոֆեսիոնալ բանակ է պետք, իսկ պրոֆեսիոնալ բանակ ունենալու համար առողջ երեխեք պետք է զորակոչվեն բանակ, որ պրոֆեսիոնալ բանակ ունենանք: Մեր երիտասարդության մեծամասնությունը ազատվում է բանակից, հիվանդ են»:
Կարդացեք նաև
Հաջորդ հարցին՝ արդյոք զինվորների թվի կրճատումը բացասական հետեւանքներ չի ունենա բանակի համար, Սասուն Միքայելյանը պատասխանեց. «Չեմ կարծում, որ թվակազմիր կրճատումը վտանգ կառաջացնի։ Ավելի կարևոր է, որ մենք պրոֆեսիոնալ զինվորներ ունենանք։ Որակ է պետք»։
Արփինե ՍԻՄՈՆՅԱՆ
