«Պարոն Միրզոյան, որպես նախկին ճեմարանական, ինձ հետաքրքիր է ձեր կարծիքն այն արշավի մասին, որ սկսվել է Հայաստանյայց առաքելական եկեղեցու նկատմամբ»,- Ազգային ժողովում 2026 թվականի բյուջեի նախագծի քննարկման ժամանակ ԱԳ նախարար Արարատ Միրզոյանին դիմեց «Հայաստան» խմբակցության պատգամավոր Ագնեսա Խամոյանը։
Արարատ Միրզոյանն ասաց, որ ինքը նախկին ճեմարանական չէ։ «Ցավոք սրտի, ձեր հարցապնդման ոչ միայն այս հատվածն էր սխալ, երկրորդ հատվածը՝ եւս։ Հայ առաքելական եկեղեցու դեմ պետության արշավ ուղղակի չկա, հետեւաբար, ես դա չեմ կարող մեկնաբանել։ Եթե դուք նկատի ունեք հայտնի մեղադրանքներով կամ կասկածով մի քանի հոգեւորականների ձերբակալությունը, կալանքը, ապա այստեղ կարող եմ ասել, որ որեւէ մեկը ՀՀ-ում օրենքից վեր չէ։ Ի վերջո, այդքան ասում ենք՝ օրենքի առաջ բոլորը հավասար են, բայց ինքներս չհավատա՞նք դրան։ Սա եկեղեցու դեմ արշավ համարելը շատ մեծ ուռճացում ու չափազանցություն է, որը ձեր քաղաքական ուժի կողմից փչած տարբեր փուչիկների պես առաջիկայում մի օր կպայթի»,- նշեց Միրզոյանը։
Ագնեսա Խամոյանն ասաց․ «Երբ ես ասում եմ, որ իշխանություններն արշավ են սկսել Եկեղեցու դեմ, ես նկատի ունեի նախ եւ առաջ երեկվա ֆեյք պատարագը, որին մասնակցում էր Նիկոլ Փաշինյանը, որն իրականացնում էր կարգալույծ եղած հոգեւորականը։ Դուք մի կաբինետի պաշտոնյա եք, որի ղեկավարը հայտարարում է, որ՝ կառավարությունը ես եմ։ Մեր Սահմանադրությամբ եկեղեցին անջատ է պետությունից, պետությունն ինչո՞ւ է խառնվում եկեղեցու գործերին»։
«Եկեղեցականների վարքի, այդ թվում՝ սեռական կյանքի հետ կապված ոչ առաջին օրն է եւ ոչ էլ միայն մենք ենք, որ այդ խոսակցությունը տեղի է ունենում, բազմաթիվ հասարակություններ անցել են եւ անցնում են դրա միջոցով»,- արձագանքեց Արարատ Միրզոյանը։
Կարդացեք նաև
Ռոզա ՀՈՎՀԱՆՆԻՍՅԱՆ
Լուսանկարում՝ Նիկոլ Փաշինյանը մասնակցում է կարգալույծ արված հոգեւորականի մատուցած «պատարագին»:
