-Այն կարեւոր դրվագներով, որոնցով որ փորձում էին մոլորեցնել հանրությանը՝ ավտոբուս վառելու, մարդկանց գյուլլելու դրվագները առհասարակ գոյություն չունեն,- այսօր լրագրողների հետ զրույցում ասաց առաջին ատյանի ընդհանուր իրավասության դատարանի շենքի բակում ի պաշտպանություն ահաբեկչության նախապատրաստման մեջ մեղադրվող Բագրատ սրբազանի եւ մյուսների դատական նիստին եկած ԱԺ «Հայաստան» խմբակցության պատգամավոր Գառնիկ Դանիելյանը:
Նրա խոսքով՝ այս գործով մինչեւ կեղծ ձայնագրությունների հրապարակումը ապատեղեկատվություն տարածեցին՝ փորձելով մոլորեցնել հանրությանը. «Արդեն իսկ մեր հանրության տարբեր շերտերի հասանելի է դառնում այն նախնական հրեշավոր պլանը, որով փորձում էին կարել, սարքել այս գործը, բայց ամեն ինչ հիմա փլուզվում է: Այս փուլում կարեւոր է, որ մարդկանց խափանման միջոցները փոխվեն, որ մարդիկ իրենց առողջական հարցերով զբաղվեն…Այս մեղադրանքները շինծու են, որեւէ կապ չունեն իրականության հետ: Իշխանությունները պետք է ներողություն խնդրեն, այս գործը շատ արագ պետք է կարճվի»:
Պատգամավորը նկատեց, որ մինչեւ հիմա միջազգային հանրության հստակ գնահատական չկա կոնկրետ անձերի, կոնկրետ դեպքերով. «Այդ նույն միջազգային հանրությունը ոչ թե պետք է պահի Նիկոլ Փաշինյանին, այլ ժողովրդավարությունը… ամենօրյա ռեժիմով կալանքի են տարվում ընտրված քաղաքապետեր, Գյումրիի, Մասիսի քաղաքապետեր, սրբազան հայրեր, հասարակության տարբեր շերտերի ներկայացուցիչներ… »:
Կարդացեք նաև
Ըստ Դանիելյանի՝ ցանկացած բռնապետ կարող է Փաշինյանի պես ամեն օր վարդ, սրտիկներ ցույց տա, բայց դրանից էությունը չի փոխվում. «Բայց դրանով խնդրի էությունը չի փոխվում, կարող է սրտիկ ցույց տա, բայց հաջորդ պահին sms հաղորդագրություն ուղարկի»:
Արփինե ՍԻՄՈՆՅԱՆ
