Վերաքննիչ հակակոռուպցիոն դատարանը արձանագրել էր, որ Սեյրան Արիստակեսյանը ենթադրյալ կաշառքի գործով որեւէ համատեղ հանդիպումների ներկա չի գտնվել, մասնակից չի դարձել, նաեւ ընդգծել էր, որ կալանքը ծայրահեղ դեպքում է կիրառելի: Այս վարույթով կիրառվել են հեռախոսային խոսակցությունների վերահսկում, ներքին, արտաքին դիտում օպերատիվ հետախուզական միջոցառումներ, պարզելու մեղադրյալի դերը:
Սեյրան Արիստակեսյանի գործով ՀՀ վերաքննիչ քրեական հակակոռուպցիոն դատարանի 2024 թ. օգոստոսի 29-ի որոշման դեմ ՀՀ գլխավոր դատախազ Աննա Վարդապետյանը հատուկ վերանայման բողոք էր բերել: Դատախազի բողոքն անցած տարվա հոկտեմբերի 21-ից Վճռաբեկ դատարանում էր:
Արիստակեսյանը ձերբակալվել էր 2024 թ. հուլիսի 30-ին: Նույն օրն էլ նրա նկատմամբ հանրային քրեական մեղադրանք էր առաջադրվել: Ապա մեկ օր հետո կալանք խափանման միջոցն էր կիրառվել 2 ամսով, նրան դատարանի որոշմամբ զրկել էին այլ անձանց հետ տեսակցելու, հաղորդակցվելու իրավունքից:
Վերաքննիչ դատարանը տնային կալանք էր ընտրել, մասնակի բեկանել առաջին ատյանի որոշումը, կիրառել միաժամանակ 15 միլիոն դրամի չափով գրավ:
Կարդացեք նաև
Ըստ գլխավոր դատախազ Աննա Վարդապետյանի, գործ ունենք դատական սխալի հետ:
Քրեական հետապնդման մարմնի տեղեկատվության համաձայն, Արիստակեսյանը օժանդակել է պաշտոնատար անձ հանդիսացող Հ.Կարապետյանին եւ Վ.Անդրիասյանին «խմբի կազմում կաշառք տվողի մատնանշած անձի օգտին պաշտոնատար անձանց կողմից հովանավորչության, ինչպես նաեւ ապօրինի անգործություն կատարելու համար առանձնապես խոշոր չափերով կաշառք ստանալուն»:
Հ.Կարապետյանը, Վ.Անդրիասյանը ՊԵԿ-ի հարկ վճարողների ընթացիկ հսկողության տեսչության բաժնի տեսուչներ են:
Նրանց ծանոթն էր Արիստակեսյանը: Տեսուչները շինարարական ընկերություններից մեկում նկատված հարկային պարտավորություններից խուսափելու փաստերը չարձանագրելու դիմաց պահանջել են յոթ միլիոն դրամի կաշառք: Ըստ մեղադրանքի, նրանք հանդիպել էին Արարատ պանդոկ-ռեստորանում, քննարկել իրենց կողմից հայտնաբերված խախտումները չարձանագրելու փաստերը: Նշյալ անձինք, շինընկերության հաշվապահին հանձնարարել էին հետին ամսաթվով ձեւակերպել չգրանցված աշխատակիցներին, հարկային մարմնին ներկայացնել «ձեւական ճշգրտված հաշվարկ»:
Վերաքննիչ դատարանը արձանագրել էր, որ Ս.Արիստակեսյանը ենթադրյալ կաշառքի վերաբերյալ որեւէ համատեղ հանդիումների ներկա չի գտնվել, մասնակից չի դարձել, նաեւ ընդգծել էր, որ կալանքը ծայրահեղ դեպքում է կիրառելի:
Օպերատիվ վերահսկման արդյունքում էր պարզվել, որ կապը տեսուչները հաստատել են Արիստակեսյանի միջոցով:
Երեկ Վճռաբեկ դատարանը մերժեց փաստորեն գլխավոր դատախազին, անփոփոխ թողեց Ս.Արստակեսյանի վերաբերյալ վերաքննիչ հակառուպցիոն դատարանի որոշումը:
Ռուզան ՄԻՆԱՍՅԱՆ
«Առավոտ» օրաթերթ
30.10.2025
