Ազատ գյուղի զինվորական կացարանում բռնկված հրդեհի ու դրա հետեւանքով 15 զինվորի մահվան դեպքով դատարանն այսօր հարցաքննեց գործով վկա, Ազատի կացարանում բռնկված հրդեհից եզակի փրկված զինծառայողներից Ռադիկ Մաթեւոսյանի ընկերուհուն՝ Լիլիթ Վարդանյանին: Նա դատարան էր բերվել հարկադրաբար եւ նիստերի դահլիճում հայտնեց, որ չի ցանկանում ցուցմունք տալ: Սակայն, ի վերջո կցկտուր ցուցմունք տվեց:
Նա ասաց՝ շատ բան չի հիշում, ճշգրիտ տվյալներ հայտնել է իր նախաքննական ցուցմունքում ու քանի որ տեւական ժամանակ է անցել դեպքից՝ կդժվարանա ճշգրիտ պատասխանել դատավարական կողմերի հարցերին:
Դեպքից առաջ վկան տեսազանգով խոսել է Ռադիկի հետ, որը նշված զորամասի ծառայողներից էր, խոսել են անձնական բնույթի հարցերից: Մնացած բոլոր հարցերին վկան պատասխանեց՝ չի հիշում:
Կարդացեք նաև
Հրապարակվեց նրա նախաքննական ցուցմունքը, որտեղ վկան պատմել էր, որ Ռադիկի հետ տեսազանգը անջատվել է կտրուկ ու Ռադիկի կողմից առանց որեւէ բան ասելու: Իրեն թվացել է՝ կապն է խափանվել, մի քանի անգամ հետ է զանգել, բայց Ռադիկը չի պատասխանել:
Նախաքննական ցուցմունքում վկան նաեւ պատմել էր, որ ողջ գիշերը չի կարողացել կապվել Ռադիկի հետ: Առավոտյան բազմիցս զանգել է նրան, սակայն նրա հեռախոսահամարն արդեն անհասանելի էր, համացանցից է տեղեկացել՝ կացարանը վառվել է:
Դեպքից հետո օրեր անց կեսօրին խոսել է Ռադիկի եղբոր՝ Ռաֆիկ Մաթևոսյանի հետ, տեղեկացել Ռադիկի առողջական վիճակի մասին: Իսկ դեպքի, կատարվածի մասին Ռադիկին երբեւէ հարցեր չի տվել, քանի որ վերջինս նմանատիպ հարցերին մշտապես պատասխանում էր՝ չի ուզում հիշել, խոսել կատարվածի մասին, քանի որ իրեն շատ վատ է զգում, երբ հիշում է դեպքը, ընկերների մահը:
Զոհված զինծառայողներից մեկի հայրը զայրացավ վկայի կեցվածքից, բա թե հարկադրաբար եկել է դատարան ու ինչ հարց տալիս են, պատասխանում է չգիտեմ, չեմ հիշում. «Յանի էս ինչ ցուցմունք է: Կապի մեջ է եղել մի մարդու հետ, որը շատ լուրջ տեղեկատվություն կարող է իրեն տված լինի: Ինքը՝ չեմ հիշում, չեմ հիշում: Նորից պահանջելու եմ, որ իրեն դատարանում հարցաքննեն, թող հիշողությունը թարմացնի»:
Արփինե ՍԻՄՈՆՅԱՆ
