«Այս հաղորդումը Նիկոլ Փաշինյանի և նրա հետ փոխկապակցված անձանց մասին է, որովհետև Հովհաննավանքում եղել են բազմաթիվ փոխկապակցված անձինք, նաև Ստեփան Ասատրյանը, և միասին իրականացրել են վանական համալիրի բռնազավթումը և պղծումը»,-ՀՀ գլխավոր դատախազության դիմաց լրագրողների հետ զրույցում հայտարարեց «Հայաքվե» ազգային քաղաքացիական միավորման համակարգող Ավետիք Չալաբյանը։
«ՀայաՔվե» միավորումը գլխավոր դատախազությանը հանցանքի մասին հաղորդում ներկայացրեց Հովհաննավանքում ապօրինի ծես կազմակերպելու և դրանում Նիկոլ Փաշինյանի մասնակցության ենթադրյալ հանցադրվագների մասին:
Ավետիք Չալաբյանը վստահեցրեց՝ հետամուտ են լինելու, որ այս ամենը հիմք դառնա քրեական գործ հարուցելու․ «Մեր երկրում դատախազությունը բնավ չի պաշտպանում քաղաքացիների շահերը, այլ ծառայում է իշխանությունը զավթած վարչախմբի շահերին։ Բայց սա անվերջ չի շարունակվի։ Կգա այն ժամանակը, երբ երկրում իշխանությունը կփոխվի և այդ ամենին պատասխան կտա։ Կարևոր է, որ այս փաստերը հանգամանալից շարադրված մտնեն իրավապահ համակարգ։ Եթե դատախազությունը հրաժարվի քրեական գործ հարուցել, մենք կդիմենք դատարան, կհասնենք մինչև ՍԴ։ Ի վերջո, կհասնենք նրան, որ այս հանցագործությունները իրավական գնահատական ստանան և մեղավորները պատժվեն»։
Կարդացեք նաև
Ավետիք Չալաբյանն ասաց՝ սա իրենց երրորդ կամ չորրորդ հաղորդումն է հանցագործության մասին․ մյուսները չեն բավարարվել ու հավելեց․ «Ակնհայտ տուժող կողմ կա։ Այս կամ այն կերպ այն մանդատը, որը այս վարչախումբը ստացել է, մոտենում է ավարտին և ի վերջո նրա վերարտադրվելու լեգիտիմ հնարավորությունները սպառվում են։ Դա զգոնության հավելյալ ազդակներ է տալիս իրավապահ համակարգին, և հույս ունենք, որ այս անգամ դատախազությունն ավելի խելամիտ կլինի և իր օրինական պարտականությունները կկատարի»։
Ըստ Ավետիք Չալաբյանի՝ եկեղեցու դեմ կատարվողը խախտում է Սահմանադրությունը․ «Սահմանադրության 18-րդ հոդվածը երաշխավորում է հայ առաքելական եկեղեցու բացառիկ դերը և որը նաև երաշխավորում է պետության պաշտպանությունը։ Բայց այսօր տեղի է ունենում հակառակը»։
«ՀայաՔվե» ազգային քաղաքացիական միավորման անդամ Մենուա Սողոմոնյանը ահազանգեց՝ եթե եկեղեցու դեմ բռնաճնշումներին իրավական գնահատական չտրվի, հնարավոր է սա վերաճի քաղաքացիական բախումների․ «Եկեղեցու դեմ բռնաճնշումները համակարգային ձևով են տեղի ունենում և դրանց՝ արձագանք չտալը հանգեցնում է քաղաքացիական բախումների։ Տարածվում է ատելության խոսք, որի դեմը չի առնվում, համապատասխան միջոցներ չեն ձեռնարկվում։ Եթե չի կանխվում, ատելության խոսքը տարածվում է, և դա անպայմանորեն ի վերջո բերելու և հանգեցնելու է քաղաքացիական բախումների և խաթարելու սահմանադրական ու իրավական կարգը ՀՀ-ում»։ Դրա համար հորդորում եմ մեր գործընկերներին գտնել այդ հարցի լուծումը և կարողանալ ներքևից գեներացնել այդ պահանջը, որ դատախազական, քննչական մարմինները համարժեք ձևով այս իրավիճակներին արձագանքեն»։
Մանրամասները՝ տեսանյութում
Տաթև ՀԱՐՈՒԹՅՈՒՆՅԱՆ
