«Ես կառավարության անդամ եմ եւ կիսում եմ կառավարության վարած քաղաքականությունը, ինչպես էլ պետք է լինի»,- խորհրդարանում լրագրողների հետ զրույցում ասաց ԿԳՄՍ նախարար Ժաննա Անդրեասյանը։ Լրագրողները հետաքրքրվել էին՝ նախարարը մասնակցելո՞ւ է Վեհափառի դեմ Նիկոլ Փաշինյանի կազմակերպած «Էջմիածինն ազատագրելու» հավաքին։ «Երբ որ կազմակերպվի՝ կմտածեմ»,-պատասխանեց նա։
Ուղիղ հարցին՝ դուք ևս կարծում եք, որ կաթողիկոսը պետք է հեռանա, նա պատասխանեց. «Ես գտնում եմ, որ մեր եկեղեցին ունի բազմաթիվ խնդիրներ, շատ կարեւորում եմ, որ հոգեւոր կյանքը լինի այնպիսին, ինչպիսին պիտի լինի։ Այսինքն, առաջին հերթին լինի հոգեւորի մասին։ Չեմ կարծում, որ այս պահին այն, ինչ տեղի է ունենում, կապ ունի հոգեւորի հետ։ Դա ինձ, ինչպես եւ ցանկացած մեր երկրի քաղաքացու՝ խորը ցավ է պատճառում։ Հույս ունեմ, որ այդ իրավիճակը արագ կհանգուցալուծվի։ Կարծում եմ, որ առաջին հերթին եկեղեցու շահերից է բխում հոգեւոր կյանքի նորոգման գործընթացը»։
Մանրամասները՝ տեսանյութում
Կարդացեք նաև
Հարց հնչեց նաեւ «Շողակաթ» հեռուստաընկերությանը հանրապետական սփռման հնարավորությունից զրկելու մասին։ Նախարարը չհամաձայնեց լրագրողի դիտարկմանը, որ «Շողակաթի» հետ տեղի ունեցողը քաղաքական վրեժխնդրություն է, քանի որ ամեն ինչ սկսվեց իշխանություն-եկեղեցի հակամարտության համատեքստում։ Ասաց՝ դա լրագրողի գնահատականն է ու հավելեց․ «Չեմ կարծում, կրթական մշակութային բովանդակության հետ որեւէ բան տեղի կունենա, որովհետեւ ոչ թե չեղարկվում է բովանդակության կարեւորությունը, այլ ընդամենը դրա ձեռքբերման եղանակն է փոխվում։ Կարծում եմ, որ մրցութային եղանակը բոլոր այն դեպքերում, երբ որ դա կիրառելի է, միշտ տալիս է ընտրության հնարավորություն, իսկ դա միշտ լավ է։ Երբ մի գործ անում ես մի տարի, երկու տարի, երեք տարի, չորս տարի, հինգ տարի, մեզնից բոլորը ունեն այդ մտայնությունը՝ ընկնելու որոշակի իներցիայի մեջ։ Իսկ մրցութային գործընթացները թույլ են տալիս նաեւ նոր ու թարմ գաղափարներ բերել։ Եվ եթե մենք ունենանք ընտրության հնարավորություն ու ընտրենք լավագույնը, ի վերջո շահելու է առաջին հերթին լսարանը»։
Հարցին՝ «Շողակաթի» բովանդակությունն ինքը արդյունավետ համարո՞ւմ է, Ժաննա Անդրեասյանը պատասխանեց՝ ընդհանրապես չի հասցնում նայել որեւէ հեռուստաալիք. «Կարծում եմ, որ կրթական մշակութային բովանդակությունը կարեւոր է։ Կառավարությունը վերջին շրջանում նաեւ քայլեր է ձեռնարկել այդ ուղղությամբ, օրինակ, «Հանրօգուտ մեդիա միջավայր» հիմնադրամի ձեւավորումը, համապատասխան դրամաշնորհների տրամադրումը կարեւոր քայլ եմ համարում, որպեսզի այդ բովանդակությունը խթանենք»։
Չհամաձայնեց դիտարկմանը, որ «Շողակաթի» հետ տեղի ունեցողը քաղաքական վրեժխնդրություն է, քանի որ այդ ամենը սկսվեց իշխանություն–եկեղեցի հակամարտության ֆոնին։
Մանրամասները՝ տեսանյութում
Նելլի ԳՐԻԳՈՐՅԱՆ
Լուսանկարը՝ արխիվային
