«Մեր երկրում չի եղել ժողովրդավարական ընտրություն՝ սկսած 1998 թվականից, այդ թվում 2018-ը, 2021-ը եւ չի էլ լինելու: Այսպես թե այնպես ասել, որ լրիվ բռնապետական ռեժիմ է, այդպես չէ, փափուկ ու կոշտի արանքում գտնվող ավտորիտար ռեժիմ է, որը մի տեղ հաղթում է, մի տեղ պարտվում է»,- Aravot.am-ին ասաց «Մայր Հայաստան» կուսակցության նախագահ Անդրանիկ Թեւանյանը՝ անդրադառնալով Վաղարշապատ համայնքում նոյեմբերի 16-ին տեղի ունեցած ավագանու ընտրություններին:
Ըստ Թեւանյանի՝ այս ընտրություններում իշխանությունները հաղթանակ տարան վարչական համախառն ռեսուրսի օգտագործման արդյունքում՝ 90-ականների ու 2000-ականների ընտրախախտումների միքսով. «Տասովչիկների ինստիտուտը չի վերացել, վերասեփականաշնորհվել է եւ կատարելագործվել է: Սրան գումարած պետականորեն բաժանվող ընտրակաշառքը. ո՞րն է դա՝ ասֆալտները քերել, բլուրները լցրել են, ասում են՝ ժողովուրդ ջան, մեզ ընտրեք, հեսա ասֆալտելու ենք: Սպառնալիքներ, մեկին բարեւում ես, լսում ես հաջորդ օրը աշխատանքից ազատել են կամ նրան կամ նրա բարեկամին »:
Անդրադառնալով Փաշինյանի հայտարարությանը, թե Վաղարշապատ համայնքի բնակիչները ընտրելով ՔՊ-ի թեկնածուին՝ նոր լիցք տվեցին «Մայր Աթոռ Սուրբ Էջմիածինը Կտրիճ Ներսիսյանից ազատելու գործընթացին»՝ պարոն Թեւանյանն ասաց. «Դեմագոգիա է իր կողմից: Թուրքական ծրագրերը փորձում է փաթաթել ժողովրդի վզին: Դա նույնն է, որ ասում էր ժողովուրդն է հանձնել Արցախը, ժողովուրդն է պարտվել: Հիմա նույն ձեւով հանցակից է դարձնում ժողովրդին, բայց այդպիսի բան չկա: Ժողովուրդը չի քվեարկել Մայր Աթոռը Փաշազադեին հանձնելու համար»։
Ըստ նրա՝ Հայ Առաքելական եկեղեցու դեմ արշավը անկախ ընտրությունների արդյունքների շարունակվելու էր, որովհետեւ պատվիրատուն դրսից է. «Փաշազադեի շուրթերով թուրք-ադրբեջանական ծրագիր է իրականացնում Նիկոլը իր կաշին փրկելու համար: Հաղթեր, թե պարտվեր, այդ արշավը պետք է տաներ»:
Կարդացեք նաև
Արփինե ՍԻՄՈՆՅԱՆ
