«Այսօր իշխանությունը վերածվել է քաղաքական հետապնդումների, հալածանքների և հաշվահարդարի բացահայտ գործիքի։ Իշխող վարչախմբի գործողություններն ուղղված են երկրում վախի մթնոլորտ սերմանելուն, իշխանությունն ամեն գնով պահելուն, որոնք հանգեցնելու են իրավական պետության հիմքերի խաթարմանն ու սահմանադրականության վերջնական տապալմանը»,- «ՀՀ-ում առկա քաղբանտարկյալների եւ նրանց խախտված իրավունքների վերականգնման մասին» լսումների ժամանակ հայտարարեց ՀՀ ԱԺ «Հայաստան» խմբակցության ղեկավար Սեյրան Օհանյանը։
Նշենք, որ ՀՀ ԱԺ «Հայաստան» խմբակցության նախաձեռնությամբ շրջանառության մեջ է դրվել ԱԺ հայտարարության նախագիծը։ Այն լրացնելու համար էլ հրավիրվել են «ՀՀ-ում առկա քաղբանտարկյալների և նրանց խախտված իրավունքների վերականգնման» թեմայով լսումներ։
Սեյրան Օհանյանն ասաց․ «Լսումների համար հիմք է հանդիսացել ՀՀ-ում արձանագրված ժողովրդավարության հետընթացը, որի բաղկացուցիչ մասն են կազմում խոսքի, խղճի, հավաքների ազատության կոպիտ ոտնահարումները, ԶԼՄ-ների հանդեպ ճնշումները, շինծու քրեական գործերը քաղաքական այլ հայացքներ ունեցող գործիչների և քաղաքացիների նկատմամբ»։
Կարդացեք նաև
«Հայաստան» խմբակցության ղեկավարը հայտնեց, որ այս նախաձեռնությունը քննարկել են նաև «Պատիվ ունեմ» խմբակցության հետ, քննարկվել է ՀՀ ԱԺ պետաիրավական հարցերի հանձնաժողովում։ Հայտնեց, որ լսումներին հրավիրել են նաև ՀՀ գլխավոր դատախազին, որը չի մասնակցում լսումներին՝ չնայած ըստ Սեյրան Օհանյանի՝ ամենաառաջին պատասխանատուն հենց ինքն է։
Նշենք, որ լսումներին ներկա է ՀՀ-ում ԱՄՆ դեսպանության քաղաքական ներկայացուցիչը։
Լսումներին ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
