ՌԴ նախագահ Վլադիմիր Պուտինը ՀԱՊԿ անդամներին վերազինման ծրագիր է առաջարկում: Այս մասին, ինչպես տեղեկանում ենք Կրեմլի կայքից, Ղրղզստանի մայրաքաղաք Բիշքեկում կայացած ՀԱՊԿ հավաքական անվտանգության խորհրդի ընդլայնված նիստում իր ելույթում հայտարարել է նա:
«Իհարկե, Ռուսաստանը կշարունակի սերտորեն համագործակցել իր դաշնակիցների հետ ՀԱՊԿ-ի ռազմական ներուժի ամրապնդման հետ կապված բոլոր հարցերում՝ կենտրոնացնելով ջանքերը ազգային զորքերի մարտական պատրաստվածության բարձրացման և հավաքական ուժերի հրամանատարության և վերահսկողության կատարելագործման վրա:
Առաջարկում ենք լայնածավալ ծրագիր սկսել հավաքական ուժերը ժամանակակից ռուսական զենքով և տեխնիկայով զինելու. դրանք իրենց արդյունավետությունն ապացուցել են իրական ռազմական գործողություններում:
Այս ոգով մենք նախատեսում ենք կազմակերպել համատեղ վարժանքների շարք՝ զորամասերի և հատուկ ծառայությունների ստորաբաժանումների համար: Դրանք ներառում են կանոնավոր վարժանքների հերթական փուլերը՝ «Փոխազդեցություն», «Էշելոն» և «Որոնում»: Կարծում ենք, որ հատուկ ուշադրություն է պահանջում կազմակերպության ավիացիոն ուժերի և ՀՕՊ համակարգի զարգացումը», – մասնավորապես ասել է ՌԴ նախագահը:
Կարդացեք նաև
Պուտինի խոսքով՝ դեռևս շատ բան կա անելու նաև խաղաղապահ ուժերի տեղակայման մեխանիզմների կատարելագործման ուղղությամբ:
«Մեր պետությունների միջև համագործակցության զարգացումը համարում ենք ՀԱՊԿ-ի ռազմական ոլորտում տեխնոլոգիական առաջատարության ապահովման համար որպես Ռուսաստանի նախագահության հիմնական առաջնահերթություն, և մենք մտադիր ենք հատուկ շեշտը դնել պաշտպանական արդյունաբերության ձեռնարկությունների միջև համագործակցության խորացման վրա։ Ռուսաստանը նաև լիովին կնպաստի համատեղ ուժերի կողմից ռազմական բժշկության վերջին նվաճումների օգտագործմանը։ Բնականաբար, մենք կշարունակենք օգնել մասնակից երկրներին սանիտարական և համաճարակաբանական բարեկեցության ոլորտում և խթանել վտանգավոր հիվանդությունների բռնկումների համատեղ կանխարգելումը», – նշել է ՌԴ նախագահը։
Հիշեցնենք՝ Բիշքեկում ՀԱՊԿ հավաքական անվտանգության խորհրդի նիստից հետո ստորագրվել է փաստաթղթերի փաթեթ, այդ թվում՝ ՀԱՊԿ-ի կոլեկտիվ անվտանգության խորհրդի հռչակագիրը և թմրանյութերի ապօրինի շրջանառության դեմ պայքարի վերաբերյալ հայտարարություն։
Հռչակագրում ասվում է. «Գոհունակությամբ նշում ենք Հայաստանի Հանրապետության և Ադրբեջանի Հանրապետության միջև ակտիվ միջպետական երկխոսությունը։
Աջակցում ենք համապարփակ կարգավորմանը և կողմերի միջև անվերապահ խաղաղության պայմանագրի արագ կնքմանը»։
