Իր նկատմամբ խափանման միջոց կալանքը վարչական վերահսկողությամբ փոխարինելու մասին դատարանի որոշումից հետո Հայաստանում միակ կին քաղբանտարկյալ Լիդյա Մանթաշյանի առաջին շփումը Aravot.am-ի եւ լրագրող Վահե Մակարյանի հետ էր: Հարցիս, թե շուրջ հինգ ամիս կալանավայրում անցկացնելուց հետո ազատության առաջին րոպեների ի՞նչ զգացում ունի, Լիդյան պատասխանեց. «Անսովոր է»:
Այնուհետեւ, պատասխանելով հարցին, թե դատարանի կայացրած որոշումը սպասելի՞ էր,՝ ավելացրեց, որ ինքը դեռ շատ բան չգիտի: «Գրառումների, ակցիաների մի մասին եմ ծանոթ: Հայ ժողովրդի այս ճնշումից հետո վերաքննիչով հաստատ փոփոխություն լինելու էր: Բոլորն այդ կարծիքին էին, որ ժողովրդի այս ճնշումին չեն կարող դիմանալ:
Շնորհակալ եմ այն արժանապատիվ հայերին, որոնք ոչ թե իմ կողքն են կանգնել այսօր, այլ փորձում են այնպես անել, որ Հայաստանում արդարադատության համակարգը վերջնականապես չկործանվի: Ժողովուրդն ասում է՝ գյուղ կանգնի՝ գերան կկոտրի: Հիմա նույնը եղավ:
Անկեղծ, շատ հուզվել եմ, երբ իմացել եմ՝ մարդիկ ինչեր են անում: Ու դա կապված չէ իմ անձի հետ: Կարեւորը դա է: Մարդիկ ինձ չեն ճանաչում: Բայց ցանկացած մարդ, որ կարդում է այս գործը, հասկանում է, որ այնտեղ ահաբեկչության տարր չկա: Ուղղակի պատժում են այն մարդկանց, ովքեր այլախոհ են, ովքեր կարող են դուրս գալ պայքարի իրենց դեմ: Սա պատժի ձեւ էր:
Կարդացեք նաև
Նախորդ անգամ, օգոստոսին Ֆարխոյանը որոշել էր, որ ես կարող է կրկին հանցանք գործեմ: եթե ես կյանքում այլ հանցանք չեմ գործել, ի՞նչ հանցանք պիտի գործեմ, պիտի դուրս գամ ահաբեկչություն գործե՞մ»,-ասաց Լիդիա Մանթաշյանը դատարանի դահլիճից դուրս գալուց հետո առաջին հարցազրույցում:
Աշոտ ՀԱԿՈԲՅԱՆ
