Երեկ ռուսական լրատվամիջոցներում տեղեկություն էր տարածվել, թե ֆուտբոլի Հայաստանի ազգային հավաքականի եւ «Ցրվենա Զվեզդայի» պաշտպան Նաիր Թիկնիզյանը կարիերան կրկին կարող է շարունակել Ռուսաստանի պրեմիեր լիգայում։ Ըստ աղբյուրի, ֆուտբոլիստով հետաքրքրվում են ՌՊԼ երկու ակումբներ։
Նաիրի Թիկնիզյանն ավելի վաղ խաղացել էր ԲԿՄԱ-ում եւ «Լոկոմոտիվում»։ Հայ ֆուտբոլիստը սերբական ակումբ տեղափոխվել է «Լոկոմոտիվից» այս տարվա հուլիսին ու նրա տրանսֆերն արժեցել է 1,7 մլն եվրո։ «Ցրվենա Զվեզդայում» Թիկնիզյանը մասնակցել է 20 հանդիպման եւ աչքի է ընկել երկու գոլային փոխանցումով։ Տվյալ պահին ֆուտբոլիստի շուկայական արժեքը 4 մլն եւրո է։
Արձագանքելով տարածված այս տեղեկատվությանը՝ Նաիր Թիկնիզյանի գործակալ Ալեքսանդր Կլյուեւը լրատվամիջոցներին հայտարարել է. «Նաիրը կարող է վերադառնա՞լ ՌՊԼ։ Առաջին անգամ եմ այդ մասին լսում։ Կարո՞ղ է նա դիտարկել Ռուսաստանի առաջնության տարբերակները։ Նայած, թե ինչ առաջարկ կլինի, ումից, ինչ առաջադրանքներ կունենա այդ ակումբը։ Մենք առայժմ այդ մասին չենք մտածել։ Նաիրը առայժմ «Ցրվենա Զվեզդայի» խաղացող է»։
Աշոտ ՀԱԿՈԲՅԱՆ
