«Սա տեխնիկական գործընթաց է, ոչ թե քաղաքական, և այն գտնվում է Թռիչքային անվտանգության եվրոպական գործակալության ձեռքերում: Եվ հիմնվելով նրանց կատարած գնահատման վրա՝ կան որոշ քայլեր, որ Հայաստանը պետք է անի, և մենք կապի մեջ ենք ՀՀ Քաղաքացիական ավիացիայի կոմիտեի հետ, և քանի դեռ չի արվել այն ամենը, ինչ պետք է արվի, որոշումը դեռ կայացված չէ»,-լրագրողների հարցին՝ ի՞նչ նորություն կարող է հայտնել Հայաստանի՝ ԵՄ ավիացիոն «սև ցուցակից» դուրս գալու հետ կապված, Բրյուսելում հայ լրագրողների հետ զրույցում այսպես պատասխանեց Եվրամիության ընդլայնման հարցերով հանձնակատար Մարթա Կոսը։
ՀՀ-ն ԵՄ ավիացիոն «սև ցուցակում» է արդեն 5 տարի։ Սա նշանակում է, որ Հայաստանի փոխադրողների վրա տարածվում է ԵՄ երկրների օդային տարածքում շահագործման արգելք՝ ավիացիոն անվտանգության միջազգային չափանիշներին չհամապատասխանելու պատճառով։ Այս ցուցակում Հայաստանը հայտնվել էր այնպիսի երկրների հետ մեկտեղ, ինչպիսիք են Աֆղանստանը, Անգոլան, Կոնգոն, Նեպալը, Սուդանը և այլն։
Այնուամենայնիվ, 2021 թվականի նոյեմբերի 15-ին Հայաստանը և Եվրոպական միությունը ստորագրեցին Ընդհանուր ավիացիոն համաձայնագիրը։ Դրան համապատասխան՝ հայկական և եվրոպական ավիաընկերությունները երկրների միջև ազատ թռիչքների իրավունք ստացան։ Սակայն համաձայնագրի իրագործումը հնարավոր է միայն այն պայմանով, որ Հայաստանը կշարունակի ազգային օրենսդրությունը հարմարեցնել ԵՄ նորմերին այնպիսի ոլորտներում, ինչպիսիք են ավիացիոն անվտանգությունը, օդային երթևեկության կառավարումը, շրջակա միջավայրի պահպանությունը, տնտեսական կարգավորումը և սպառողների իրավունքների պաշտպանությունը։
ՀՀ Քաղաքացիական ավիացիայի կոմիտեն 2024 թվականի հոկտեմբերի 1-ին «սև ցուցակից» հանելու նպատակով դիմում է ներկայացրել Տրանսպորտի նախարարների եվրոպական կոնֆերանսին։ Գործընթացը սկսվել է նոյեմբերին 13-ին, երբ տեղի է ունեցել Հայաստանի և ՏԿԵՆ–ի ներկայացուցիչների առաջին հանդիպումը։ Դեկտեմբերի 24-ին հայկական կողմը փոխանցել է նախկինում հայտնաբերված խախտումները վերացնելը հաստատող փաստաթղթերի փաթեթը՝ դրանք պաշտոնապես վավերացնելու և հետագայում որոշում կայացնելու նպատակով։ Եվրոպական հանձնաժողովի կողմից այս տարվա սեպտեմբերի 1-5-ը ՀՀ-ում անցկացվել է գնահատողական այց։
Կարդացեք նաև
Հանձնակատարը վստահեցրեց՝ սա տեխնիկական գործընթաց է, և այն ոչ մի կապ չունի երկրի քաղաքական հարաբերությունների հետ․ «Մենք պարզապես ուզում ենք վստահ լինել, որ անվտանգության գծով ամեն ինչ կարգին կլինի, և այդ պատճառով մենք առաջարկել ենք հատուկ օգնություն Թվինինգ (Twinning) գործընթացում, որոնք այնուհետև կֆինանսավորվեն: Սա հատուկ գործիք է, որով մեր անդամ երկրների փորձագետները, ովքեր փորձ ունեն այս ոլորտում, օգնում են ձեր կառավարությանը այս հարցում»։
Տաթև ՀԱՐՈՒԹՅՈՒՆՅԱՆ
Բրյուսել
