Այսօր մենք ազդարարում ենք համապետական հանրագրի մեկնարկ հոսանքի սակագինն իջեցնելու պահանջով: Այս մասին այսօր լրագրողների հետ հանդիպման ժամանակ ասաց «Մեր ձեւով» շարժման անդամ, սահմանադրագետ Գոհար Մելոյանը:
Նա հիշեցրեց, որ այս տարվա մայիսին ՀԷՑ-ի սեփականատերերը Հանրային ծառայությունները կարգավորող հանձնաժողովին (ՀԾԿՀ) ներկայացրին դիմում` հայտնելով, որ իրենց արդյունավետ կառավարման արդյունքում կուտակված մոտ 3 միլիարդ դրամի հաշվին իջեցվի հոսանքի սակագինը. «Այս դիմումը մերժվել էր՝ հիմնավորմամբ, որ հնարավոր է հետագա կիսամյակի ընթացքում այս կուտակված գումարը նվազի, բայց ինչպես սեփականատերերը ճշգրիտ հաշվարկել էին, երկրորդ կիսամյակում այդ գումարը ոչ միայն կրկնապատկվել է, այլեւ գերազանցել էր կրկնապատիկը: Այս պահի դրությամբ վեց միլիարդ դրամից ավելի կուտակված գումար կա»:
Գոհար Մելոյանը հիշեցրեց նաեւ, որ հոկտեմբերի 30-ին «Տաշիր կապիտալը» կրկին դիմում է ուղարկել ՀԾԿՀ՝ հոսանքի սակագինը իջեցնելու պահանջով, բայց այդ դիմումին ՀԾԿՀ-ն միչ օրս չի արձագանքել. «Հետեւաբար, ի դեմս «Մեր ձեւով» շարժման՝ մեկնարկում ենք համապետական ստորագրահավաք հանրագրի տեսքով: Այսօր տալիս ենք այդ ստորագրահավաքի մեկնարկը, արդյունքում իրավասու մարմինը լինելու է Հանրային ծառայությունները կարգավորող հանձնաժողովը, որտեղ մեր պահանջը մուտք ենք անելու ՀՀ բնակիչների ստորագրություններով»:
Արփինե ՍԻՄՈՆՅԱՆ
