Արդարադատության նախարար Սրբուհի Գալյանն այսօր լրագրողների հետ ճեպազրույցում «Առավոտ»-ի հարցին ի պատասխան անդրադարձավ ՔՊ ընդունած էթիկայի կանոնագրքին։
Իշխանության ներկայացուցիչների, այդ թվում՝ Նիկոլ Փաշինյանի հայհոյախառը բառապաշարը վերջին տարիներին քննադատվել է տարբեր գործիչների կողմից։ Օրերս «Միասնության թեւեր» շարժման ղեկավար Արման Թաթոյանն իր ասուլիսում դարձյալ անդրադարձել էր ՔՊ-ական պաշտոնյաների բառապաշարին։
Հարցին, թե ինչո՞ւ են որոշել էթիկայի կանոնագիրք ընդունել հենց նախընտրական շրջանում, եւ իր դուրը գալի՞ս է ՔՊ-ականների բառապաշարը, Սրբուհի Գալյանը պատասխանեց․ «Իմ դուրը գալիս է, թե չի եկել, դա այլ հարց է, բայց վստահաբար դա չի եկել Կոռուպցիայի կանխարգելման հանձնաժողովի դուրը, որը հստակ դրսեւորում է ունեցել։ Մենք տեսել ենք, որ համապատասխան վարույթ է հարուցվել հանձնաժողովի կողմից, համապատասխան եզրակացություն է հրապարակվել»։
Նախարարը նշեց, որ էթիկայի կանոնագիրքը միանշանակ պետք է։ «Էթիկայի կանոնագիրք կամ կարգավորումներ ունենալու հետ կապված աշխատանքը պետք է շատ ավելի վաղ տարվի։ Ենթադրում եմ՝ շատ ավելի վաղ սկսել են աշխատել կանոնագրքի ստեղծման շուրջ, եւ միայն հիմա է պատրաստ եղել»,- ասաց Գալյանը։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
«Ենթադրում եմ՝ շատ ավելի վաղ սկսել են աշխատել կանոնագրքի ստեղծման շուրջ…»
Այո, դեռևս 2007-ից, երբ այդ կանոնագրքի առաջին տարբերակն էր ներկայացվում ուղտի ականջում քնած մեր հանրությանը։
Հարց /«Մենք մեր մասին» ամսագիր, 6/9 2007/ Ասացիք կուռքեր, պաշտամունք, բայց կա նաև հակառակ երևույթը` հայհոյանքներ, անձնական վիրավորանքներ, իսկ սա նորմա՞լ երևույթ է:
Պատասխան /Նիկոլ Փաշինյան/ Անձնական վիրավորանքների մասին խոսելիս` մեր թերթի անունը հաճախ են տալիս: Թող մեզ ոչ մեկ չվիրավորի, մենք ոչ մեկի չենք վիրավորի, բայց ով փորձի մեզ վիրավորել, մենք նրան ուղղակի կսատկացնենք: Հայաստանում ընդունված է, որ գրագետ, գրող մարդը պետք է լինի խեղճ: Ինձ համար շատ կարևոր է, որ մարդիկ հասկանան` գրողը, մտավորականը անողնաշար մեկը չէ, ում կարելի է վիրավորել, ով վիրավորի, տասնապատիկ կստանա պատասխանը: Այսօր հաճախ են խոսում լրագրողական էթիկայի մասին: Խորհուրդ եմ տալիս այդ էթիկայով զբաղվել կարտոֆիլի քարոզով, այդ էթիկան մեզ վրա չի տարածվում, մենք ազատ մարդիկ ենք և ինքներս ենք որոշում էթիկայի սահմանները: