ՀՀ ԳԱԱ հարկի ներքո բացվել է «Ուսում Ռուսաստանում» խորագրով երկօրյա ցուցահանդեսը, որի շրջանակում Հայաստան են ժամանել ՌԴ առաջատար բուհերի ներկայացուցիչներ։ Միջոցառումը բացել է Հայաստանում ՌԴ դեսպանատան խորհրդական-դեսպանորդ Մաքսիմ Սելեզնյովը: Նրա խոսքով, ռուսաստանյան բուհերը, նաեւ Մ․ Լոմոնոսովի անվան Մոսկվայի պետական համալսարանի եւ Պլեխանովի անվան Ռուսաստանի տնտեսագիտական համալսարանի երեւանյան մասնաճյուղերը ներկայացնում են միջազգային ծրագրեր, եւ հայաստանցի դիմորդները կարող են սովորել Ռուսաստանում։
«Առաջիկա երկու օրերի ընթացքում աշակերտները կկարողանան տեսնել ռուսական բարձրագույն կրթության լայն հնարավորությունները, ստանալ ամբողջական եւ թարմ տեղեկատվություն՝ ուղղությունների եւ մասնագիտությունների մասին։ Նրանք նաեւ հնարավորություն կունենան տեղեկանալու անվճար ուսուցման եւ կրթական դրամաշնորհների մասին»,-հավելել է Սելեզնյովը: Դիվանագետի ձեւակերպմամբ, նշյալ ցուցահանդեսը կրթության ոլորտում 2 երկրների արդյունավետ համագործակցության օրինակ է:
Կարդացեք նաև
Երեւանում Ռոսսոտրուդնիչեստվոյի ներկայացուցչության ղեկավար Վադիմ Ֆեֆիլովն էլ ընդգծել է, որ ՌԴ առաջատար բուհերն ու դրանց մասնաճյուղերը Հայաստանում 2 օր շարունակ կներկայացնեն ՌԴ կրթության ոլորտի հնարավորությունների ողջ բազմազանությունը։ Նա փաստել է, որ ամեն տարի ավելի քան 3000 ուսանող անվճար կրթություն է ստանում Ռուսաստանի բարձրագույն ուսումնական հաստատություններում՝ Ռոսսոտրուդնիչեստվոյի քվոտային ծրագրի շրջանակում։
Նշենք, որ թիվս այլ հաստատությունների, ցուցահանդես են այցելել Բ․ Ժամկոչյանի անվան թիվ 119 ավագ դպրոցի, Ն․ Գոգոլի անվան թիվ 35 հիմնական դպրոցի, Լ․ Տոլստոյի անվան թիվ 128 հիմնական դպրոցի աշակերտները, ինչպես նաեւ Երևանի պետական հումանիտար քոլեջի, ռուսաստանյան բուհերի Երեւանի մասնաճյուղի ուսանողները։
Գոհար ՀԱԿՈԲՅԱՆ
Նկարները՝ Կորյուն Ասլանյանի
