«Քաղբանտարկյալ Նարեկ Սամսոնյանի կնոջ՝ Լուսինե Առաքելյանի եւ AntiFake-ի նամակը հանձնվեց ԵՄ պատվիրակության անվտանգության աշխատակցին։ Մենք ակնկալում էինք, որ գուցե դեսպանությունից ավելի բարձր մակարդակի վերաբերմունք կլինի Հայաստանում քաղաքական հետապնդումների օրակարգով մեր ուղերձին ի պատասխան։ Բայց նամակը վերցրեց անվտանգության աշխատակիցը։
ԱՄՆ դեսպանության դիմաց մեր ակցիայի ժամանակ, երբ հանձնում էինք նամակը, այնտեղ առհասարակ ընդունված կարգ չէ որեւէ նամակ առձեռն վերցնել։ Եվ մենք ստիպված էինք այն ուղարկել էլեկտրոնային փոստով։
Այս դեպքում անվտանգության աշխատակցին հանձնեցինք։ Հուսանք, որ պատշաճ տեղ կհասնի եւ հուսանք, որ կլինի պատշաճ արձագանք»,- Հայաստանում ԵՄ պատվիրակության նստավայրի դիմաց Նարեկ Սամսոնյանի եւ Վազգեն Սաղաթելյանի դեմ իրականացվող ապօրինությունների վերաբերյալ Նարեկ Սամսոնյանի կնոջ՝ Լուսինե Առաքելյանի եւ AntiFake.am-ի նամակը փոխանցելուց հետո Aravot.am-ին ասաց AntiFake.am-ի գլխավոր խմբագիր, փաստաբան Աստղիկ Մաթեւոսյանը։
Կարդացեք նաև
Հարցին, թե արդյո՞ք համապատասխան վերաբերմունքի դրսեւորում է, որ նամակները վերցնելու եկավ անվտանգության ծառայության աշխատակիցը, այլ ոչ թե պատվիրակության որեւէ անդամ, Աստղիկ Մաթեւոսյանը պատասխանեց. «Կարծում եմ, որ դա ավելի շատ կարող է պրոտոկոլային ընթացակարգ լինել։ Մենք նամակում հստակ շարադրել ենք, որ ակնկալում ենք հանդիպում, հրապարակային արձագանք։ Արդեն հետագա արձագանքից կախված կլինի՝ սա վերաբերմո՞ւնք է Հայաստանում քաղաքական հետապնդումների նկատմամբ, թե՞ անտարբերություն է»։
Աշոտ ՀԱԿՈԲՅԱՆ
