Երեւանի քաղաքապետարանի գործակարգավարական խորհրդակցության ժամանակ Երեխաների եւ սոցիալական պաշտպանության վարչության պետի ժամանակավոր պաշտոնակատար Գեւորգ Ղարիբյանը քաղաքապետ Տիգրան Ավինյանին զեկուցեց, որ մանկապարտեզներում նոյեմբերի 26-ից մեկնարկել է 3-6 տարեկան երեխաների հուզական եւ մտավոր կարողությունների զարգացման նոր փորձնական ծրագիր, որում ներառված է 184 երեխա:
Նա նաեւ նշեց, որ մանկապարտեզների 15 մասնագետներ անցել են համապարփակ վերապատրաստություն: Հավելեց, որ մոտակա օրերին կսկսվի Վեքսլերի թեստի կիրառումը, իսկ ծրագրի արդյունավետ գնահատման արդյունքում հնարավորություն կտրվի հասկանալ երեխաների կարիքները , նույնականացնել աջակցության եւ զարգացման կարիք ունեցող ոլորտները, գտնել խնդիրների լուծման տարբերակներ: Գեւորգ Ղարիբյանը տեղեկացրեց, որ հետագայում հնարավոր է ծրագիրը ներդրվի բոլոր մանկապարտեզներում:
Ի թիվս այլնի, Ավինյանին զեկուցեցին Կասկադ համալիրի արդիականացման ծրագրի քննարկումների մասին: Քաղաքապետի խորհրդական Սոնա Թեւանյանի ձեւակերպմամբ, գործընթացներում առաջընթաց կա, խոսքը վերաբերվում է Կասկադ համալիրի անավարտ հատվածի վերակառուցմանը, Կասկադ մշակութային հանգույց նախագծի իրականացմանն ուղղված պայմանագրի ստորագրմանը՝ ներդրողի հետ, որի հիման վրա կկարգավորվեն կողմերի իրավահարաբերությունները: Նա ասաց, որ նախատեսվում է կնքել հարակից հատվածի հողամասի առք ու վաճառքի պայմանագիրը: Նշվեց, որ ծրագրի իրականացման ժամկետը 5 տարի է:
«Շատ կարեւոր պայմանագիր ենք ստորագրել, շատ բարդ գործընթացներով անցած տասնամյակների խնդիր ենք լուծում: Ոչ միայն խնդիր ենք լուծում քաղաքաշինական, այլեւ քաղաքի համար ստեղծում ենք շատ կարեւոր ենթակառուցվածք: Քաղաքը ստանում է 1000-ից ավելի տեղանոց գեղեցիկ համերգասրահ, ժամանակակից արվեստի նոր թանգարանի տարածքներ, տարատեսակ հանրային տարածքներ, որոնք ոչ թե քաղաքապետարանինն են, այլ քաղաքինը:
Կարդացեք նաև
Ես գիտեմ, որ ախորժակը շատ մեծ է, բայց այնուամենայնիվ պետք է հիշեցնեմ, որ մենք ունենք պայմանագրային որոշակի տրամաբանություն ֆինանսական, թե ինչքան գումար է ծախսվելու մշակութային հանգույցի վրա, դրա համար խնդրում եմ փորձենք մնալ մոտ 70 միլիոնի շրջանակներում: Նախնական 50-ից դարձրել ենք 70-ի կարգի»,-ասաց Ավինյանը:
Հիշեցնենք, որ Կասկադ համալիրի վերակառուցման «Կասկադ մշակութային հանգույց» ճարտարապետական նախագծի իրականացման իրավունքի շնորհման բաց մրցույթում հաղթող էր ճանաչվել «Ջի Թի Բի Դիվելոփմենթ», «Ռեալ Ջի», «Կարգո Սըլուշն բրոքերեյջ», «Կարգո Էքսպրես Ջորջիա» ՍՊԸ-ներից կազմված կոնսորցիումը, որի անունից հանդես է գալիս «Ջի Թի Բի Դիվելոփմենթ» ՍՊԸ-ն: Վերջինս հաղթող է ճանաչվել Երեւանի քաղաքապետ Տիգրան Ավինյանի որոշմամբ հաստատված մրցութային հանձնաժողովի կողմից, որի նախագահը նույնպես Տիգրան Ավինյանն է։
«Ջի Թի Բի դիվելոփմենթ» ՍՊԸ-ն հիմնադրվել է 2024թ․ հոկտեմբերի 24-ին։ Դրա իրական շահառուն Գրիգոր Տեր-Ղազարյանն է, որը «Հանրապետություն» կուսակցության առաջնորդ Արամ Սարգսյանի եղբոր՝ Արմեն Սարգսյանի փեսան է։ Իսկ «Հանրապետություն» կուսակցությունը ներկայացված է Երեւանի ավագանիում, ավելին՝ 2023-ի ավագանու ընտրություններից հետո համագործակցության հուշագիր է ստորագրել «Քաղաքացիական պայմանագիր» կուսակցության հետ։«Ռեալ Ջի» ՍՊԸ-ն եւս Գրիգոր Տեր-Ղազարյանինն է։ Այն հիմնադրվել է 2025թ․ փետրվարի 4-ին։ Ի դեպ, Գրիգոր Տեր-Ղազարյանը նախկինում դատապարտված է եղել խարդախության համար:
Գոհար ՀԱԿՈԲՅԱՆ
