«Միասնության թեւեր» քաղաքական նախաձեռնության հիմնադիր ղեկավար, Իրավունքի եւ արդարության կենտրոն «Թաթոյան» հիմնադրամի տնօրեն, ՀՀ մարդու իրավունքների նախկին պաշտպան Արման Թաթոյանը ֆեյսբուքում գրառում էր կատարել՝ նշելով, որ սահմանազատման գործընթացը, որ իբր պետք է հանգեցներ ադրբեջանական զորքի` Հայաստանի ինքնիշխան տարածքներից դուրսբերմանը, իրականում խաբեություն է։ Դրա համար Արման Թաթոյանը Նիկոլ Փաշինյանին առաջարկել էր հերթական անգամ յուրացնել իր գաղափարը եւ վերանվանել Սեւ լիճն ու հարակից տարածքները՝ «Դոնալդ Թրամփի ազգային արգելոց», իսկ Ջերմուկի լեռները՝ մինչև Սոճիների պուրակը՝ «Մելանյա Թրամփի ազգային արգելոց», դրանով հանդերձ խնդիրներ ստեղծելով Իլհամ Ալիեւի եւ նրա օգնական Հիքմեթ Հաջիեւի համար:
Թեմայի վերաբերյալ Aravot.am-ի հետ զրույցում քաղտեխնոլոգ Կարեն Քոչարյանը հետեւյալ կերպ արձագանքեց. «Ես չեմ կարծում, որ Նիկոլը խանդավառված սա ուզելու է անել, չեմ հավատում, որովհետեւ նախ կասեն, որ գաղափարը Արման Թաթոյանից է վերցրել, իսկ իր «պագոնները» դրանից կընկնեն: Նաեւ ինքը չի ուզենա որեւէ հարաբերություն փչացնել:
Չեմ ասում, թե լավ են հարաբերությունները, բայց օրերս մենք տեսանք, որ Արցախ բառը հայ եւ ադրբեջանցի փորձագետների հեռուստակամուրջի ժամանակ օգտագործելիս, ինչպես միանգամից ադրբեջանցիներն ասացին, թե չեք ուզում խաղաղություն, եթե Արցախ եզրույթն եք օգտագործում: Այնպես որ, եթե Նիկոլ Փաշինյանը հայտարարի նման արգելոցների մասին, Ալիեւը կջղայնանա իր վրա, դրա համար էլ ինքը չի անի»:
Գոհար ՀԱԿՈԲՅԱՆ
