«Առողջության իրավունք» ՀԿ-ի նախագահ Անուշ Պողոսյանի ֆեյսբուքյան գրառումը
Հայաստանի Հանրապետության չարորակ նորագոյացությունների առանցքային ցուցանիշների վերլուծությունը, մասնավորապես նորագոյացությունների տարածվածության շարժընթացը և առավել տարածված նոզոլոգիաների վիճակագրական պատկերը, վկայում են իրավիճակի շեշտակի վատթարացման մասին։
Կյանքում առաջին անգամ հաստատված ախտորոշմամբ չարորակ նորագոյացություններով հիվանդների թիվը 2022 թվականի համեմատ աճել է 1874-ով, ինչը կազմում է շուրջ 22% աճ։
Կարդացեք նաև
Չարորակ նորագոյացություններով ապրող պացիենտների ընդհանուր թվաքանակը տարեվերջին ևս աճել է շուրջ 21%։
Սակայն այս ամբողջ վտանգավոր և աճող դինամիկայի ֆոնին Առողջապահության նախարարության կողմից իրականացվող սկրինինգային ծրագրերի կատարողականը շարունակաբար նվազում է։
Մասնավորապես՝ կրծքագեղձի քաղցկեղի սկրինինգային ծրագրի կատարողականը նվազել է 48%–ով, ինչը փաստացի հակասում է նախարարության կողմից հնչեցվող կանխարգելման վերաբերյալ հայտարարություններին։
Անահիտ Ավանեսյան, երբ հոկտեմբերին՝ կանանց կրծքագեղձի քաղցկեղի իրազեկման ամսվա շրջանակում, Դուք կառավարության անդամների կոստյումներին ամրացնում էիք սինվոլիկ իրազեկման նշանը, արդար կլիներ նույն պահին ներկայացնել նաև Ձեր ոլորտի իրական վիճակը բնութագրող այս ցուցանիշները։
Երբ կրծքագեղձի քաղցկեղի սկրինինգի կատարողականը նվազել է 48%, սկրինինգային ծրագրերի ընդհանուր ընդգրկվածությունը տարվա ընթացքում շարունակաբար անկում է ապրում, իսկ նոր դեպքերի թիվը աճում է 22%, դժվար է խոսել արդյունավետ կանխարգելման մասին։
Հանրությանը փոխանցվող գեղեցիկ ժեստերը չեն կարող փոխարինել այն կտրտուկ աշխատանքին, որը պարտադիր է հիվանդացության այս մակարդակներում։
Եվ, այո, նաեւ արդար կլիներ, որ Նիկոլ Փաշինյանին ներկայացնեիք ոչ միայն սիմվոլիկան, այլև այդ սիմվոլիկայի հակառակ կողմում կանգնած մերկ թվերը, որովհետև դրանք են իրական պատկերը, ոչ թե արշավային ատրիբուտիկան։
