Կառավարության նիստից հետո լրագրողների հետ ճեպազրույցում Առողջապահության նախարար Անահիտ Ավանեսյանն անդրադարձավ Հայ Առաքելական եկեղեցու Շիրակի թեմի առաջնորդ Միքայել սրբազանի առողջական վիճակին։
Ավելի վաղ ԱԺ պատգամավոր Գառնիկ Դանիելյանն էր ահազանգել, որ կալանքի տակ գտնվող Միքայել սրբազանը անհապաղ վիրահատության կարիք ունի։ Այնուհետեւ, այդ մասին հայտարարություն էր տարածել նրա պաշտպանական թիմը՝ ներկայացնելով փաստեր։
Անահիտ Ավանեսյանն ասաց․ «Ես պետք է ասեմ, որ անազատության մեջ գտնվող բոլոր անձինք հավասար կերպով օգտվում են անհրաժեշտ բուժօգնությունից։ Եվ չկա որեւէ անձ այսօր քրեակատարողական հիմնարկում, ով անհրաժեշտություն ունի բուժզննման, սպասարկման, վիրահատության, եւ ինչ-որ կերպով սահմանափակված է նրա իրավունքը։ Ես սա բացառում եմ, սա իմ անձնական եւ մեր համակարգի հստակ վերահսկողության ներքո է»։
Անդրադառնալով Միքայել սրբազանին՝ Ավանեսյանն ասաց․ «Մենք այսօր ենք ստացել նման դիմում եւ միանշանակ կդիտարկենք, օրենքով սահմանված ընթացակարգերով կնայենք, ընթացք կտանք»։ Նա նշեց, որ պաշտպանների կողմից է ստացվել դիմումը։ Նախարարը նաեւ հավելեց․ «Մենք նախորդ անգամ դիմում չենք ստացել, որն ըստ համապատասխան ընթացակարգերի ենթադրել է այն պահանջը, ինչը հիմա հնչեցվում է»։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
