Հարություն Գրիգորյանի «Կրկին դատվելու ապօրինի գործով», օրենքով սահմանված ժամկետից շուրջ 10 օր անց, ստացա դատավոր Հայկ Պետրոսյանի կողմից կայացված խայտառակ դատավճիռը։
Շուրջ 5 տարի 8 ամիս անազատության մեջ գտնվող անձի նկատմամբ, եւս շուրջ 6 ամիս անհիմն պատիժ նշանակելով` կիրառված տնային կալանքը, գրավը եւ բացակայելու արգելքը փոխարինվել են կալանքով՝ ընդամենը նշելով, որ դա արվում է պատիժ կրելուց խուսափելու հնարավորությունը բացառելու նպատակով։
Ու սա այն պարագայում, երբ՝
- Հարութը դեռ 6 տարի առաջ ինքնակամ ներկայացել էր իրավապահներին։
- Պայմանական վաղաժամկետ ազատվել էր, իսկ Վերաքննիչ քրեական դատարանի կողմից որոշումը բեկանվելուց հետո իր ոտքով գնացել էր քրեակատարողական հիմնարկ՝ ավելի քան 7 ամիս մնացյալ պատիժը կրելու։
- Անազատության ընթացքում նրան երկու անգամ տրամադրվել էր արձակուրդ, եւ նա պարտաճանաչորեն վերադարձել էր քրեակատարողական հիմնարկ։
- Եվրոպական դատարանն արդեն գրանցել է այս գործով ներկայացված գանգատը, որը վերաբերում է ինչպես կրկին դատվելուն, այնպես էլ անհիմն երկար անձին անազատության մեջ պահելուն։
- Տնային կալանքի մեկ օրը հավասար է կալանքի մեկ օրվան, ինչը նշանակում է, որ Հարութին մնում էր ոչ թե խուսափել պատիժը կրելուց, այլ ընդամենը բողոքարկել ակնհայտ ապօրինի դատավճիռը եւ, վատագույն դեպքում, նշանակված այդ 6 ամիսը շարունակել անցկացնել տանը։
Կարճ ասած՝ սկզբունքայնություն չպահանջող որոշ գործերում, երբեմն արդարացման ակտերով սյուրպրիզներ շռայլող դատավորն այս գործով կայացրել է այնպիսի դատավճիռ, որով կիրառված խափանման միջոցը ոչ թե պարունակում է պատժի տարրեր, այլ ոտքից գլուխ հանդիսանում է պատիժ։
Կարդացեք նաև
Այսուհետ՝ դասախոսություններում, որպես պատիժ կիրառված խափանման միջոցի դասական օրինակ, ուսանողներին ներկայացնելու եմ հենց այս դատավճիռը։
Ափսոս, որ վաղը Հարություն Գրիգորյանին, ինչպես ժամանակին իր եղբորը, հատուցում է տրամադրվելու ոչ թե դատավորի, այլ ՀՀ բյուջեի հաշվին։
Լևոն ՍԱՀԱԿՅԱՆ
փաստաբան
«Առավոտ» օրաթերթ
12.12.2025
