Արմավիրի մարզի Այգեշատի սուրբ Գևորգ եկեղեցում Նիկոլ Փաշինյանի մասնակցությամբ «պատարագի» պատարագիչն այսօր եղել է անձամբ Արմավիրի թեմի առաջնորդ Տ. Սիոն արքեպիսկոպոս Ադամյանը։ Լրատվամիջոցների ուղիղ հեռարձակումներում երեւում է, որ Այգեշատի եկեղեցում տեղադրվել է ՀՀ դրոշը, ինչպես Նիկոլ Փաշինյանն էր հրահանգել օրեր առաջ։
Սիոն արքեպիսկոպոս Ադամյանը նույնպես զեղչել է պատարագը՝ չհնչեցնելով Կաթողիկոսի անունը։ Նրան օգնել է նույն թեմի քահանա տեր Մկրտիչ Մուշադյանը։ Վերջինս անցած կիրակի պատարագ էր մատուցել Գյումրիի Յոթ Վերք եկեղեցում՝ զեղչելով Կաթողիկոսի և Շիրակի թեմի կալանավորված առաջնորդ Միքայել արքեպիսկոպոս Աջապահյանի անունները։
Նիկոլ Փաշինյանին ուղեկցողների շքախումբն այսօր փոքր է եղել՝ ՏԿԵ նախարար Դավիթ Խուդաթյան, Արմավիրի մարզպետ Վահրամ Խաչատրյանը, Նիկոլ Փաշինյանի մամուլի խոսնակը, ՔՊ-ական մի քանի պատգամավորներ, ՏԿԵ նախկին նախարար Գնել Սանոսյան։
Կարդացեք նաև
«Ես որոշել եմ ինքս անել պատարագը։ Առաջնորդը իրավունք ունի՝ որոշել եւ անել։ Բոլորը համաձայն են եղել»,- «պատարագի» ավարտից հետո լրագրողի հարցին ի պատասխան ասաց Սիոն արքեպիսկոպոս Ադամյանը։ Լրագրողի ճշտող հարցին՝ բոլորը համաձա՞յն են եղել, որ Կաթողիկոսի անունը զեղչվի, պատասխանեց՝ այո։ Վեհափառի անունի զեղչումը նա կանոնական խախտում չհամարեց։ Պնդեց՝ Նիկոլ Փաշինյանը Կաթողիկոսին հեռացնելու մասին հայտարարություն չի արել, ինքն էլ չի ստարագրել փաստաթղթի տակ, որը ենթադրում է Կաթողիկոսին հեռացնել գահից․ «Այլ բան է գրված, գնացեք՝ ուշադիր կարդացեք»։ Նաեւ ասաց՝ Գարեգին Բ-ին համարում է հայրապետ։
Նելլի ԳՐԻԳՈՐՅԱՆ
