Երեւանի քաղաքապետ Տիգրան Ավինյանին քաղաքապետարանի գործակարգավարական խորհրդակցության ժամանակ զեկուցեցին տարածատեղեկատվական միասնական GIS համակարգի ընդլայնման հնարավորությունների մասին: Նշվեց, որ, օրինակ, իրականացվել է արհեստական բանականության կիրառմամբ ասֆալտի շերտի մաշվածքի վերլուծություն, գործիքի միջոցով հայտնաբերվում են ասֆալտի ճաքերը, փոսերը, մաշվածքը, կոմունալ դիտահորերը: Ավինյանին զեկուցեցին նաեւ, որ մյուս ուղղությունն էլ վերաբերվում է քաղաքային պլանավորման մեջ կիրառվող GIS համակարգի ուրբան մոդուլին:
«Մեր տեխնոլոգիական լուծումներն ավելի արդի են դառնում, եւ մեզ համար մեծ հնարավորություններ են ստեղծվում՝ չլսելու տարատեսակ արդարացումներ վերլուծության կարողություն չունենալու եւ առհասարակ նմանատիպ քննարկումներից զերծ մնալու համար: Այն գործիքակազմը, որ մենք ունենք, իրականում բազմաշերտ է: Օրինակ, GIS քարտեզով մենք տեսանք կադաստրային շերտը, նոր ուրբան համակարգը եւ կարող ենք ունենալ որոշակի տվյալահեն տեղեկատվություն այս կամ այն ծրագրի վերաբերյալ»,-ասաց Տիգրան Ավինյանը:
Նա նշեց, որ հաջորդ տարվանից քաղաքապետարանի բոլոր ստորաբաժանումները պարտավոր են լինելու աշխատել GIS համակարգով, եւ քաղաքացին քաղաքապետարանի բոլոր հարթակներում կարողանալու է տեսնել իրեն անհրաժեշտ տվյալները: Ավինյանը հույս հայտնեց, որ նույն սկզբունքով հաջորդ տարվանից կարձանագրվեն ապօրինի գովազդները, կուտակված աղբը եւ ամեն բան, ինչ կծրագրվի, իսկ խախտումները կուղարկվեն համապատասխան տնտեսվարողներին:
Կարդացեք նաև
Մանրամասն՝ տեսանյութում
Գոհար ՀԱԿՈԲՅԱՆ
