Ermenihaber. Դեկտեմբերի 23-ին Թուրքիայի մայրաքաղաք Անկարայի Էսենբողա օդանավակայանից Լիբիայի մայրաքաղաք Տրիպոլի ուղևորվող օդանավը կործանվել է Անկարա նահանգի Համայնա շրջանի Քեսիքքավաք գյուղում: Լիբիայի վարչապետ Աբդյուլհամիդ Դիբեյբեի հայտարարության համաձայն՝ ավիավթարի հետևանքով մահացել է օդանավի մեջ գտնվող ամբողջ անձնակազմը, այդ թվում՝ Լիբիայի գլխավոր շտաբի պետ, բանակի գեներալ Մուհամմեդ Ալի ալ-Հադդադը:
Վթարը տեղի է ունեցել երեկոյան 20:52-ի սահմաններում, իսկ դրանում եղել է լիբիացի զինվորականներից բաղկացած պատվիրակության 5 անդամ, այդ թվում՝ Ալի ալ-Հադդադը: Ըստ տեղեկությունների՝ նախքան վթարն օդանավի անձնակազմը էլեկտրաէներգիայի սնուցման խափանման պատճառով արտակարգ վայրէջք է խնդրել, սակայն այն իրացնել չի հաջողել:
Օդանավի կործանումից հետո դեպքի վայր են մեկնել Թուրքիայի ժանդարմերիայի, փրկարար ծառայության և շտապօգնության բրիգադներ: Վերջիններիս հաջողվել է, չնայած եղանակային վատ պայմաններին, գտնել կործանված ինքնաթիռի մասերը: Համապատասխան աշխատանքները շարունակվում են:
Անկարայի գլխավոր դատախազության կողմից դեպքի հանգամանքների ուսումնասիրման նպատակով հետաքննություն է հարուցվել, որում ներառվել է 4 դատախազ: Արտակարգ իրավիճակով պայմանավորված Էսենբողայի օդանավակայանի թռիչքները ժամանակավորապես կասեցվել էին, սակայն ավելի ուշ՝ թույլատրվել:
Կարդացեք նաև
Վթարի ականատեսներից Բեքիր Թաներ անունով մեկը լրագրողների հետ զրույցում նշել է, որ ուժեղ աղմուկ են լսել, ապա արագ շտապել այդ ուղղությամբ, ինչպես նաև փրկարար ջոկատների հետ մասնակցել իրականացվող աշխատանքներին:
Լիբիայի մայրաքաղաք բարձրաստիճան զինվորական տեղափոխող օդանավի կործանմանն անդրադարձել է Թուրքիայի ներքին գործերի նախարար Ալի Յերլիքայան՝ գրառում կատարելով «Nsosyal» սոցհարթակի օգտահաշվում:
«Անկարայի Էսենբողա օդանավակայանից Տրիպոլի գնալու համար թռիչք իրականացրած ինքնաթիռի մասերը մեր ժանդարմերիայի ջոկատների կողմից հայտնաբերվել են Համայնա շրջանի Քեսիքքավաք գյուղից դեպի հարավ՝ 2 կմ հեռավորության վրա: Հանրությունը կտեղեկացվի զարգացումների մասին»:
Հավելենք, որ Լիբիայի բանակի գեներալի գլխավորած պատվիրակության այցը Անկարա պայմանավորված էր Թուրքիայի գլխավոր շտաբի պետ, բանակի գեներալ Սելչուք Բայրաքթարօղլուի պաշտոնական հրավերով: Վերջիններս անցկացրել էին թե՛ երկկողմ, և թե՛ ընդլայնված կազմով հանդիպումներ:
