44-օրյա պատերազմում զոհված հերոս Մխիթար Գալեյանի հայրը՝ Գարիկ Գալեյանն ազատության մեջ է: Այս մասին քիչ առաջ ուղիղ եթերով հայտարարեց Գալեյանի պաշտպան Վահան Հովհաննիսյանը:
«Դուրս ենք գալիս պրոբացիայի ծառայությունից, հանվեց արդեն էլեկտրոնային հսկողության սարքը: Գարիկ Գալեյանն այսօրվանից լիակատար ազատության մեջ է»,- հայտարարեց Վահան Հովհաննիսյանը:
Նա հիշեցրեց, որ Գալեյանը դատավոր Մասիս Մելքոնյանի վճռով դատապարտվել էր 2,5 տարվա ազատազրկման, Վերաքննիչ դատարանը իրենց բողոքը բավարարել էր մասնակի՝ նշանակելով 1,5 տարվա ազատազրկում: Փաստաբանն ասաց՝ ներկայացրել են նաեւ Վճռաբեկ բողոք, այն դեռ դատարանի տիրույթում է, պատասխան չունեն. «Քանի որ 1,5 տարվա ընթացքում կալանքի տակ էր՝ սկզբում բանտային, հետո տնային, 1,5 տարին լրանալուց հետո այսօր ազատ արձակվեց:
Գարիկ Գալեյանն առաջին մարդն էր, որի նկատմամբ ոչ մեծ ու միջին ծանրության նման հանցանքների համար ազատազրկում էր նշանակվել դատավճռով: Հարցում էինք կատարել եւ պարզել, որ այդ ժամանակ այդ հոդվածներով քրեակատարողական հիմնարկներում պատիժ էր կրում երկու անձ՝ մեկը կրկնահանցագործության համար էր դատապարտված, մյուսն էլ առավել ծանր հանցանքների հետ համակցությամբ»:
Կարդացեք նաև
Արփինե ՍԻՄՈՆՅԱՆ
