«Համատեղ հայտարարությունը կարդալով՝ մեր մտահոգությունները ոչ միայն չեն փարատվել, այլ ավելի խորացել են»,- լրագրողների հետ ճեպազրույցում անդրադառնալով «Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) նախագծի` Հայաստան-ԱՄՆ իրականացման շրջանակի հրապարակման վերաբերյալ համատեղ հայտարարությանը՝ կարծիք հայտնեց ՀՀ ԱԺ «Հայաստան» խմբակցության պատգամավոր Արթուր Խաչատրյանը։
Ըստ նրա՝ այս փաստաթղթում որևէ ակնարկ չկա այն մասին, որ ՀՀ-ի ապաշրջափակումը վերացվում է․ «Կար հստակ որոշակիություն, որ Ադրբեջանը ստանում է անխոչընդոտ անցման իրավունք, ՀՀ-ն ստանում է անորոշ ինչ-որ առավելություններ։ Երբ ՀՀ-ն Ադրբեջանի միջոցով սկսեց ստանալ մի բուռ ցորեն և բենզին՝ մասնավորապես տրանզիտի իրավունքով, քանի որ ՀՀ-ն միայն ներմուծում է, ոչինչ չի արտահանում, ՀՀ-ն Ադրբեջանին փաստացի տրամադրում է միջանցք, փոխարենը Ադրբեջանը ՀՀ-ին թույլ է տալիս իր տարածքով ինչ-որ մի բան ներմուծել։ Եթե ուզում ենք կապուղիների ապաշրջափակում, ՀՀ-ն էլ պետք է նախ անխոչընդոտ անցում ստանա, միանա Արարատի մարզի հետ, ՀՀ հյուսիսային ճանապարհը պետք է բացվի․ Իջևան-Ղազախ ճանապարհի մասին եմ խոսում, նաև դեպի արևմուտք ճանապարհների բացում պիտի լինի․ Գյումրի-Կարս երկաթուղին առնվազն պետք է ապահովվի․ այստեղ դա չկա»։
Պատգամավորը հուսով է, որ ամերիկյան քննարկումների ժամանակ իրանական հարցը չի արծարծվել․ «Դա մեզ համար բավականին ծանր անվտանգային մարտահրավեր կարող է ստեղծել։ Ստեղծման օրվանից ՀՀ իշխանությունները կարողացել են աշխատել բարեկամական հարաբերություններ ապահովել ԱՄՆ-ի, ԵՄ-ի, ՌԴ-ի և Իրանի հետ։ Մեր ամենածանր զգուշացումը կամ մտահոգությունն այն է, որ ՀՀ-ն կարող է ինչ-որ պահի դրվել հստակ երկընտրանքի առաջ՝ կամ-կամ։ Այս դեպքում մենք շատ լուրջ անվտանգային մարտահրավերների առաջ ենք կանգնելու»։
Կարդացեք նաև
Ճեպազրույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
