«Իմ քայլը» խմբակցության ղեկավար Արմեն Գալջյանի ֆեյսբուքյան գրառումը
Համակարգային կոռուպցիան մեր երկրում այն աստիճան է արմատախիլ արված, որ արդեն երկու օր շարունակ ամբողջ տեղեկատվական դաշտը զբաղված է վարչապետի՝ հավելյալ 1.5 միլիոն դրամ աշխատավարձ ստանալու թեմայով։ Խոսքը մի թվի մասին է, որը շատ դեպքերում համադրելի է միջին ծրագրավորողի կամ մասնավոր ընկերության տնօրենի աշխատավարձի հետ, իսկ որոշ դեպքերում նույնիսկ ավելի ցածր պաշտոն զբաղեցնող մասնագետների վարձատրության մակարդակին է համապատասխանում։
Արդյոք տրամաբանական չէ՞, որ պետության բարձրագույն գործադիր պաշտոնը զբաղեցնող անձը, հատկապես վարչապետը, պետք է ունենա համարժեք և պատասխանատվությանը համապատասխան վարձատրություն։ Ի վերջո, խոսքը գնում է հսկայական պատասխանատվության, պետական կառավարման բարդ համակարգի ղեկավարման և ռազմավարական որոշումների մասին, որոնց ազդեցությունը տարածվում է ամբողջ երկրի զարգացման, անվտանգության և ապագայի վրա։
Տարօրինակն այն է, որ տարիներ շարունակ ոչ ոքի չի հետաքրքրել նախկին բարձրաստիճան պաշտոնյաների աշխատավարձի չափը։ Շատ դեպքերում նրանք անգամ չեն էլ իմացել, թե որքան է իրենց պաշտոնական վարձատրությունը, քանի որ զուգահեռ ունեցել են անհայտ ծագման խոշոր գումարներ, բազմամիլիոնանոց գույք, բիզնեսներ և տարբեր ակտիվներ։ Այդ ժամանակ աշխատավարձը, պարգևավճարները կամ եկամուտների թափանցիկությունը հասարակական և մեդիա օրակարգում պարզապես գոյություն չունեին իսկ այսօր պարգևավճարը կամ բարձրաստիճան պաշտոնյաների կողմից հիփոթեքային վարկով տուն գնելը ներկայացվում է կոռուպցիոն բուրգին համարժեք մի արարք։
Կարդացեք նաև
Նույն տրամաբանությամբ մեկ այլ հոդվածում նշվում էր, թե երկու փոխվարչապետերը 2021–2025 թվականների ընթացքում ստացել են ընդհանուր 106 միլիոն դրամ պարգևավճար։ Սակայն պարզ հաշվարկը ցույց է տալիս, որ 106 միլիոն դրամը 60 ամիսների բաժանելիս ստացվում է, որ յուրաքանչյուր փոխվարչապետ ամսական ստացել է շուրջ 883 հազար դրամ հավելավճար, ինչը նման բարձր պատասխանատվություն և ծանրաբեռնվածություն ունեցող պաշտոնների համար լիովին նորմալ և հիմնավորված վարձատրություն է։
